Shillong, Nailur 02
Ar ngut ki suba nongkhaïi drok ba kynthup ka kynthei, ki la shah kem noh ha ki pulit ka Anti Narcotic Task Force (ANTF) bad na kine ki la ïoh kurup ïa u drok heroin.
Ïa kine ki arngut la kem ha ka miet sngi Nyngkong na ka thaiñ Rilbong, kata hadien ki jingtip ba bniah ba la ïoh, ka ANTF kala pynlong ïa ka jingkhynra ha ka Nepali compound ha Rilbong bad ïoh kem ïa kine ki arngut kiba kyrteng u Sadik Ahmed (27) bad ka Arti Dorjee (28).
Ki pulit kila ïoh kurup ïa u heroin ba thep ha ki saw tylli ki synduk sabon na ka ïingwai ba ki sah, uba khia haduh 42.10 gram. Ïa kine ki arngut la register case ha thanad Laban hapoh ka Narcotic Drugs and Psychotropic Substances (NDPS) Act bad ka jingtohkit ka la ïaid shakhmat.
