Shillong, K’Lyngkot 20
Ka lympung ïalehkai Second Division Cricket League 2026 ba la pynïaid da ka Shillong Cricket Association ka la nangjam shaphrang ha kaba ka Matrisangha ka la khur jingjop hadien ba ka la pynliem noh ïa ka Nongpdeng CC da 189 run ha ka sngi Ba-ar.
Ha kane ka jingïakhun kaba la long ha madan Urkaliar, ka Nongpdeng kaba la jop ïa ka kynting pisa ka la ailad ïa ka Matrisangha ba kan tied nyngkong ha kaba ka la kamai 296 run bad shah pynkhyllem 2 wiket ha ki 20 over. Kane ka la wan urlong lyngba ka jinglah ban ïalehkai bha u Snehal Dutta uba la ïoh ban khyrwit haduh 170 run na ki 59 bol bad u Kaushik Bhowmik uba la ïoh 78 run na ki 46 bol. Katba u Donboklang Hoojon bad u Pynkhrawbok Thabah ki la khur mar 1 wiket na ka bynta ka Nongpdeng.
Haba wan beh ïa ka thong ba la buh da ka liang pyrshah, ki nongtied ka Nongpdeng ki la shah pynkhyllem baroh bad kamai tang 107 run ha ki 17.3 over. U Maitshaphrang Khongjee u la tied 31 run na ki 26 bol bad u Raymond Thabah u la ïoh 18 run na ki 22 bol. Katba u Kishor Bhowmik u la khur 5 wiket bad ïa ki 2 wiket la ïoh da u Ravi Sunar. Ïa ka nam Player of the Match la ïoh da u Snehal Dutta.
