Shillong, Rymphang 01
Ka Shooting Association of Meghalaya (SAM) ha ka 28 tarik mynta u bnai ka la plie ïa ka kamra klass bad ka shlem treikam jong ka, ha Laitumkhrah bad kane ka long shi bynta jong ka jingpynkhreh ïa ka 39th National Games 2027.
Ïa kane la plie da u Assistant Director ka tnat ïalehkai u Bah Khroobok Passah kum u kongsan ha ka jingïadon lang ki nongïalam katei ka synjuk kata u President Bah John F. Kharshiing, kumjuh u Bah Niel Suting bad kiwei kiwei.
Na ka liang u Bah Passah u la ai khulei ïa katei ka synjuk ïalehkai halor ka jinglah ban ïoh ïa ki jingdonkam na ka bynta ki khynnah ïalehkai bad ruh kaba long shi bynta jong ka jingpynkhreh bad ban pynbiang ïa ki jaka ïalehkai na ka bynta katei ka lympung bah ka ban long ha u snem 2027.
Ka jingïadon lang kham bun ki dkhot jong katei ka synjuk bad ki nongsiat suloi jong ka, ka pyni ïa ka jingshimkhia lang ban pynkhlaiñ ïa kane ka jingïalehkai siat suloi ha ka Jylla hashwa ka National Games ka ban long ha u snem ban wan.
La don lang ha katei ka sngi kynthup lang ruh ïa ka Aditi Gargote, Sports Psychologist na ka Gun For Glory, kaba la pynïaid ïa ka Sports Psychology Camp na ka bynta ki ïalehkai siat suloi jong ka SAM. Kane ka prokram ai jinghikai ka la sdang naduh 26 tarik mynta u bnai bad ka la neh haduh 30 tarik da ka jingthmu ban pynbha ïa ka jinglong jingman jong ka jingmut jingpyrkhat, ka jingpynleit jingmut, bad ka jingpynkhreh ïa ki nongïalehkai.
Katei ka kamra klas bad ka shlem treikam ba la plie thymmai kan long kum ka jaka pdeng na ka bynta ban pynïaid ïa ki kam ki jam, ki jingïalang ha ka jingnang jingtip, ki jinghikai shaphang ka jingmut jingpyrkhat, bad ki jingïalang treikam, bad la khmih lynti ba kan don ka bynta kaba kongsan ha ka jingpynkhreh ryntih ïa ki nongsiat jong ka Jylla na ka bynta ka lympung ïalehkai 39th National Games 2027.
