Shillong, Lber 25
Ka Hynñiewtrep Integrated Organizations (HITO) sengkmie hapoh ka jingïalam u Bah Donbok Dkhar, President, ha ka 25 tarik u Lber 2026, ki la leit ban ïakynduh ïa u Divisional Forest Officer (DFO) halor ka jngpyndonkam beaiñ ka kompeni Riangdo Veneer Private Limited ïa ki kor ot dieng khlem da ïoh jingbit.
Ka HITO ka la leit ban ïakynduh ïa u DFO ha ka Forest Management Building, kaba don ha Lachaumier.
Haba kren sha ki lad pathai khubor u Bah Donbok Dkhar u la ong ha ka por ba ka seng ka la leit ban ïakhih sha katei ka karkhana ka la lap ba kane ka kompeni Riangdo Veneer ka la pyndonkam beaiñ ïa ki kor ot dieng bad ban pynjot ïa ka mariang da kaba pom pathar ïa ki dieng kaba long beaiñ.
U la ong ba kane ka jingpom pathar katei ka kompeni ïa ki dieng khlaw ka long kaba la pynkheiñ ïa ki aiñ jong ka Forest, da kaba ïathuh ruh ba ka tnad Forest kan sa pynngat kyndon ïa kane ka kompeni.
Hashuwa ba ka HITO kan ïakynduh ïa u DFO ka tnad Forest, la sakhi ba ki bor pulit ki la pahara bha hakhmat ka khyrdop khnang ban lait na kano-kano ka jingmih huri hura.
Hadien ba ka seng ka la dep ban ujor, ka tnad Forest ka la shim kam ïa katei ka kompeni ban nym shah ban pyndonkam ïa ki mashin ot dieng khlem da pat ïoh jingbit, la ong u Bah Donbok.
Namarkata, u ong ba ka seng ka ap ïa ka kaiphod na ka MeECL, ka MSPCB bad ïa ka tnad Forest ba kin shim kam mardor halor kane ka jingujor bad lada jia ba kine kim shim khia, kin sa pynlong da ka jingïakhih kaba tyngeh hakhmat kine ki ophis treikam.
Haba ïadei bad ka kam dieng khlaw, u Bah Donbok u ong “Hadien ba ka Supreme Court ka la pynmih ka hukum ban khangnoh ïa ka jingot ïa ki dieng bad ban khaïi, hynrei ngi lap ba ka Sorkar Meghalaya hi ha u snem 2008 ka la ‘pass’ ïa ka ‘resolution’ katba ha u snem 2009 ka Sorkar ka khlem phah ïa ka ‘resolution’ sha Delhi ban khang ïa kata ka jingot dieng hapoh ka Jylla”.
Nalorkata, u la maham jur ruh ïa kine ki kompeni hapoh Umiam baroh ba “Lada wan pynhap dieng ki paradoh parasnam jong ngi, ki dei ban pynkhuid ïa ka pisa kaba ki dei ban siew.”
