Brazil, Risaw:
U kyrtong president jong ka liang ka diang uba la shah rem, u Flavio Bolsonaro, ula mih noh na Brazil ban leit sha America wat hapdeng ka hukum jong ka ïingbishar, kaba khang ïa u ban mih na katei ka ri, ong ki lad pathai khubor jong ka US, ha ka sngi thohdieng.
U khun jong u nongïalam barim uba la shah set phatok, u Jair Bolsonaro, u la shah rem ha ka elekshon President ha ka Sngi U Blei, ha u nongïalam ba mynta, u Luiz Inacio Lula da Silva bad u la kyntait ban kam ïa ka jingshah rem.
Utei u senator uba dei na ka liang ka diang, u la ong ha ka sngi Nyngkong ba u nongbishar jong ka Supreme Court u la hukum ïa u ban aiti ïa ki passport jong u. U Bolsonaro u don hapoh ka jingtohkit halor ka jingkynnoh ba u la bamsap bad pyndonkam bakla ïa ka pisa, bad ryngkat bad ka jingshah rem jong u ha ka elekshon, u la buh ruh ban duh noh ïa ka jinglaitluid ha ka parliament.
Une u Rangbah, uba 45 snem ka rta, ula poi sha America, ong ka CNN bad ka Washington Post, ha kaba kawei pa kawei, ka la kdew na ka tyllong khubor, kaba khlem pynpaw kyrteng. Hangno u la hiar ym pat tip.
Ka tnat kam bar ri jong ka US, ka ong ha ka Sngi Ba-ar, ba kan ai Visa, ïa U Bolsonaro bad ïa ka iing ka sem jongu, khlem da pynthikna ïa ki jingthmu leit jingleit jongu.
Ka tyllong khubor na ki pulit ka la ïathuh ha ki nongthoh khubor ba la weng noh ïa ki passport jong u Senator na Brazil bad ki nongmihkhmat bad bynrap ba “ym don kano kano ka jingthoh ba thikna ba u Flavio Bolsonaro un mih noh na ka ri.”
Hynrei u la bat ïa ka jinglong trai ri Italy naduh u snem 2023, katkum ka kot khubor jong ka iing dorbar thawain jong ka Italy kaba la paw da ki lad pathai khubor.
U nongpyniaid elekshon jong u Bolsonaro, u Rogerio Marinho, u la pynpaw ïa ka jingsngew kyndit halor ki khubor ba u kyrtong uba la shah rem u la phet krad na Brazil.
