Washington, Risaw:
Katkum ki khubor, la ong ba ka jingpynlut jong ka US ha ka tnat ïada naduh ba jia ka thma bad ka Iran ka la kiew sha ka $47 Billion, kaba la kiew ruh da 25% ban ïa kaba ka tnat ïada ka US ka la pynbna ha u Naitung jong une u snem.
Watla katta, la ong ba ka Pentagon kam shym la jubab mardor halor ka jingkyrpad ban ai jingmut halor ka jingkheiñ jong ka, kaba ym shym la pynpaw paidbah. Ka jingpynpaw shaphang ka jingkiew dor jong ka thma Iran ka wan ha ka por ba ki Republican ki ïakhun pyrshah ïa ka jingshah pynhap ha ka saiñ hima sima jong ka jingïakynad bym sngewtynnad ha shwa ka elekshon ha ka 3 tarik u Nailur ka ban rai ïa ka jingsynshar ïa ka Congress ha ki ar snem ban wan.
Ka jingktah jong ka thma ïa ka jinglut jingsep ha ka bor ding ha ka pyrthei ka la khia ïa ka jingkyrshan ïa ki kyrtong jong ka Republican bad ka la ktah ïa ka jingmynjur jong u President Donald Trump. Ka Republican Party jong u Trump, ka bat ïa ka jingbun paid kaba rit ha baroh ar tylli ki kamra jong ka Congress.
Ka jingkhein kaba khatduh jong ka Pentagon ka la iadei bad ka jinglut jingsep ha ka jingtreikam ban pynlong ïa ka thma, ha kaba la antad ba ka jinglut kan long palat $29 klur ban bujli ïa ki tiar ialeh ba la pynlut ba la pyndonkam ha ka jingialeh.
Yn donkam palat ïa ka $6 billion ban bujli ïa ki tiar shipai bad kiba la khot “ki jingduhnong ha ki platform,” kiba kynthup ïa ka jingduhnong jong ki liengsuin kynthup ïa kiba bun ki drone kiba la duh noh ha ka por thma.
U Trump, ula sdang ïa ka thma Iran ryngkat bad ka Israel, ha u bnai February, ha kaba ula antad, ba katei ka jingïakynad, kan neh tang khyndiat por.
Ka buit ba nyngkong jong u Trump ha ka thma Iran ka la pynleit jingmut ha kaba pyndonkam nyngkong ïa ki missile kiba rem dor bad kiba thikna bha ban bom ïa ki jaka ïada jong ka Iran khnang ba hadien kan lah ban pyndonkam da ki tiar kiba rem dor, kynthup ïa ki bom ba pynkhih bor kum ki JDAM ba la pynher na ka suiñbneng, kiba bun bha.
Hynrei ka jingsangeh thma ha u bnai Risaw ka la ai por ïa ka Iran ban tih ïa ki jaka buh marbam hapoh khyndew, da kaba wanrah biang online ïa ki katto katne ki jingïada jong ka Iran, kumjuh ruh ïa ki namding bad ki drone kiba la ym lah ban ïoh rung.
Naduh katei ka por, u Trump u la pynjari ïa ka jingkhang dam jong ki shipai duriaw ïa ka Iran ban pynïap thngan ïa ka na ka khajna na ka jingshalan umphniang shabar ri bad u la bat ïa ka jinglah ban sdang biang ïa ki kam ïaleh pyrshah hadien ka elekshon shiteng samoi. Ki heh jong ka US, kiba kren khlem da kwah ban pynpaw kyrteng, ki ong ba ka Pentagon, ka la thmu ban sdang biang ïa ka jingialeh kaba jur, lada shah hukum ban leh kumta.
Ka jingkheiñ ba khatduh jong ka Pentagon ka ïanujor bad ka jingkheiñ jong u myntri kam ïada ri u Pete Hegseth ha u bnai Jylliew kaba long $37.5 billion na ka bynta ka jinglut ha ka thma.
