Nongstoiñ, Lber 25
Ka All Lyngngam Organisation (ALO) ka khot ka wer ïa baroh ki paidbah ka bri u hynñiewtrep ban wan sha ka Dongrynniew Festival 2026 ïa kaba yn pynlong ha Nongjri, South West Khasi Hills.
U Dr. B Mawsor, President ka ALO ha ka jingdonlang u Bah Bendrowell Hashah, General Secretary ka ALO u la ong ba kane ka tamasa kan long ha ka 10 bad 11 tarik u bnai Ïaïong, 2026 bad shibun kiei-kiei ki bym pat ju ïohi yn sa ïohi ha kaba ïadei bad ka jingriewspah jong ka riam ka rukom jong ka jaidbynriew Lyngngam.
Shuh shuh u la ong ruh ba ha kane ka tamasa kan don ka jingshad kum ka shad Seiñ Khynrum kaba 12 sienkit lane 12 group bad ïa kane ka jingshad yn shad tang ki shynrang namar ki hap mareh bad mastieh bad la ju pyndonkam ïa kane ka jingshad tang ha ka por leh niam dap snem uba ïap bad pdiang burom ïa ki riewheh ha kano-kano ka prokram kumjuh ruh ka Shad Lynñiang bad kiwei kiwei.
