Aizawl, ïaïong:
Ka seng jong ki samla pule ba pawnam jong ka Mizoram, ka Mizo Zirlai Pawl (MZP), ka la khot ban pynjari kham tyngeh ïa ka rukom ai Inner Line Permit (ILP), da kaba kdew ïa ka jingsngewkhia kaba nang jur halor ka jingkynnoh ba ka jingkiew jong ka jingwan rung jong ki bym dei ki trai shnong khlem ki kot ki sla kiba biang.
Kane ka jingdawa ka dei ka rai ba kongsan ba la pdiang ha ka jingïalang jong ka Federal Council jong ka MZP, ka kynhun shim rai ba hakhliehduh jong ka seng, kaba la long ha Aizawl ha ka sngi Thohdieng, ong u General Secretary jong ka MZP, u Lalhmingsanga Chhangte.
Katkum ka jingong jong katei ka seng, ka Council da kawei ka sur ka la rai ban kyntu ïa ka sorkar jylla ban pynkhlaiñ bad pynthymmai ïa ka rukom treikam jong ka ILP ban tehlakam ïa ka jingwan tuid be-aiñ jong ki briew ki bym dei riewlum sha kane ka jylla.
Haba kren ha kane ka jingïalang, u President ka MZP u C Lalremruata u la ong ba ka jingïada ïa ka rukom treikam ka ILP ka long kaba kongsan bha na ka bynta ban ïada ïa ka jinglong kyrpang, ka jingshngaiñ bad ka lawei jong ki trai ri trai muluk ka Mizoram.
U la pynpaw ïa ka jingsngewkhia halor ka jingkiew kaba dang shen ha ka jingkynnoh ba ki briew kiba nabar ki wan rung khlem jingbit, da kaba khot ïa kane ka jingeh kaba khraw.
U Lalremruata u la kyntu ruh ïa ki nongïalam jong ka MZP ha kylleng ki tnad ban pynjur ïa ka jingpeit bniah naduh tynrai bad ban pynthikna ban pyntreikam kham bha ïa ka rukom treikam jong ka ILP.
U la ban jur ïa ka jingdonkam ban buddien kham pyrkhing, ban pynbha ïa ka jingpyntreikam bad ban pynsngewthuh paidbah kham bun ha kaba ïadei bad ka rukom treikam.
Ka MZP ka la pynpaw ruh ïa ki jingsngewkhia halor ki jingeh kiba ïadei bad ka jinglong kyrpang hapdeng ki “Zofa” (jaitbynriew Mizo) kiba sah ha ki bynta bapher bapher jong ka ri bad shabar ri. Katba ka dang pynskhem biang ïa ka jingkular jong ka ban ïatylli hapdeng baroh ki briew Zofa, ka seng ka la maham pyrshah ïa ka jingpyndonkam bakla ïa ka jinglong Mizo na ka bynta ka jingmyntoi shimet.
Lait na ka ILP, ka Council ka la ïakren ïa shibun ki mat bad shim ïa ki katto katne ki rai, kynthup ban kyntu ïa ka sorkar ban weng ïa ka jingduna nonghikai, ban kyntiew ïa ka aiñ Mizo (Zo nun zemawi) ha ki jaka pule, bad ban pynbun ïa ki jaka leh ïa ka Common University Entrance Test (CUET) ha ka jylla.
Ka seng ka la ong ba kan dang ïai bteng ban ïatreilang bad ka sorkar ban pynthikna ïa ka jingpyntreikam kaba paka ïa ki jingdawa jong ka bad ban ïada ïa ka jingmyntoi jong ki paidbah.
