Itanagar, ïaïong:
Ka Cabinet Committee on Economic Affairs (CCEA), ba la pynïaid da u Myntri Rangbahduh ka ri, u Narendra Modi, ka la mynjur ïa ar tylli ki projek pynmih bording kiba heh ha Arunachal Pradesh ha ka jingbei tyngka lang kaba palat T.40,000 klur, kaba pyni ïa ka jingpynbor kaba khraw ban pynheh ïa ka bor pynmih bording ha ka thaiñ Shatei-Mihngi.
Ki projek ki kynthup ïa ka Kamala Hydro Electric Project kaba heh 1,720 MW bad ka Kalai-II Hydro Electric Project kaba heh 1,200 MW, kaba thmu ban pynkhlaiñ ïa ka jingpynmih bording, ka jingshong shngaiñ jong ka Grid bad ka jingpynïaid ïa ka jingdonkam bad ka jingdawa kaba heh tam.
Ïa kane ka projek Kamala kaba kot sha ka 26,069.50 klur tyngka yn pynroi ha kylleng ki distrik Kamle, Kra Daadi bad Kurung Kumey ha ka jingkheiñ kaba 96 bnai. Da ka jinglah ba la buh 1,720 MW, la khmih lynti ba kan pynmih bording kumba 6,870 Million Units (MU) shisnem.
Nalor ka jingpynmih bording, ïa kane ka projek la shna khnang ban kyrshan ïa ka jingpynjem ïa ka jingshlei um ha ka them Brahmaputra bad ban ïarap ban pynïadei ïa ka bording jong ka ri.
Ïa kane ka projek yn pyntreikam lyngba ka jingïatreilang hapdeng ka NHPC Limited bad ka sorkar Arunachal Pradesh. Ka sorkar pdeng kan ai pisa T.4,743.98 klur na ka bynta ban pynjem ïa ka jingshlei um, T.1,340 klur na ka bynta ban pynlah ïa ki jingtei bad T.750 klur kum ka jingkyrshan kaba katkum ki rukom.
Ka jylla kan ïoh 12% ka bording ba laitluid, ryngkat bad ka jingpynrung sa 1% kaba la mang sha ka Local Area Development Fund (LADF).
Ka kynhun Myntri ka la pynkhuid ruh ïa ka projek Kalai-II kaba shongdor T.14,105.83 klur ha ka wah Lohit kaba don ha Anjaw distrik, ban pyndep hapoh 78 bnai. Da ka bor ba la buh 1,200 MW, la khmih lynti ba kane ka projek kan pynmih kumba 4,852.95 MU shisnem bad kan dei ka projek pynmih bording kaba heh kaba nyngkong eh ha ka Lohit basin.
Ïa kane ka Kalai-II Project yn pyntreikam lyngba ka jingïatreilang hapdeng ka THDC India Limited bad ka sorkar jylla.
Ka sorkar pdeng kan pynheh T.599.88 klur na ka bynta ban pynlah ïa ki jingtei bad T.750 klur kum ka jingkyrshan kumba dei rukom.
Baroh ar tylli ki projek la khmih lynti ba kin pynkhih ïa ka jingpynroi ïa ki jingtei ha ki jaka ba jngai.
Ka projek Kamala kan kynthup ïa ka jingshna ïa ki surok bad ki jingkieng kiba jrong haduh 196 km, katba ka projek Kalai-II kan pyndap kumba 29 km.
Ki heh sorkar ki la ong ba ki projek kin kyrshan ruh ïa ka jingpynroi ïa ki jingtei ha ka imlang sahlang, kynthup ïa ka koit ka khiah, ka pule puthi bad ki ïew ki hat ha ka thaiñ, nalor ka jingpynmih kam bad ka jingai bai lutksan bad ki jingmyntoi jong ka CSR.
Ki jingmynjur ki long shi bynta jong ka jingpyrshang ba kham ïar ban buh ïa ka Arunachal Pradesh kum ka jaka ba kongsan jong ka bording um.
Kiwei pat ki projek kiba heh ha ka jylla ki kynthup ïa ka projek Subansiri Lower kaba 2,000 MW, ka Dibang Multipurpose Project kaba 2,880 MW bad ka Etalin kaba la thmu ban shna 3,097 MW.
Ka projek Subansiri Lower ka don ha ka kyrdan kaba kham shakhmat, ha kaba 750 MW la dep ban pyntreikam bad ïa ka bor kaba dang sah la khmih lynti ban pyndep noh ha u bnai Nohprah, 2026.
