D H Kharkongor
ïa mynta shipor ngam da kham pynleit jingmut than eh ïa kino kino ki ‘drama’ ki jong ka jaitbynriew ka jong ngi hynrei ïa kane ka jinglong ka jingman kaba hangtai ha ka ‘Strait of Hormuz’, kaba nga lah ban ong ba ka la nangktah suki jai-pa-jai ïa ka jinglong jingman jong ka pyrthei shityllup.Kumta ïa mynta shipor ngam da pynleit jingmut than eh ïa kine ki ‘drama’ jong kane ka saiñ – hima sima lane ki ‘drama’ jong kane ka kam saiñ – pyrthei ka jong ngi.Tangba nga sngewtynnad pat de ban pule kai ïa kaei kaba ki jong ngi ki don ban ‘kynthoh’ lane ban ‘comment’ halor jong kita ki jait ‘drama’. Nga ju kum ‘kyntoh’ lem ruh tangba tang kum ka jingkynshoit ba kin nang ïa ‘kynthoh’ shuh shuh. Ki ‘jingkynthoh’ na kiba nga sa ringdur ïa ka jinglong jong ka jaitbynriew ka jong ngi. Kawei na ki ka dei halor kita ki ‘Thei awria’ jong ka ‘Khyndai-Lad’.
Ka long kaba ma, ïa ka jaitbynriew bad ïa ka pyrthei hi baroh kawei, ynda haba uba bun balang u dei uba khim than eh naduh ka jingmut ka jingpyrkhat tad haduh ka mynsiem. U paid uba shongshit biej u dei ka ‘jingma’ kaba khraw tam na baroh. Kan long kumta wei ba kiba kum kita ki ïasyriem ruh de ïa u ‘khah’ uba dem ngon kat shaba beh ka lyer. Kynmaw ruh de ba u dei uba kum uta u juh u paid uba ha kaba nyngkong u pyrta shithrem “Hosannah Hossanah” katba hadien pat de u pyrta shla bad dawa “Sah-narphna Sah-narphna”.
Kynmaw ba ngim don bor halor ki shibun kiei kiei. Ngi hap ban shu pdiang ïa ki kumba ki long. Kumta to long kiba stad bad kiba shemphang ban ithuh ïa kita kiei kiei. To sngewthuh shai ruh de ba kam myntoi ban pynlyngkhum ïa la ka jong ka jingmut ka jingpyrkhat halor kiba kum kita kiei kiei. Kaba katno tam ban pynkhuslai ruh de ïa la ka jong ka mynsiem namar kiba kum kita kiei kiei. Kam myntoi naba ngin nym lah ban pynkylla.
Peit nuksa ruh de ïa u ‘ngap. U ‘ngap’ um ju pynsepei kai ïa la ka jong ka por bad ïa la ka jong ka bor ha kaba ïatai nia bad u ‘kain-ïong’, kata, ban ‘pynsngewthuh’ ïa u ‘kain-ïong’ ba ka ‘um-ngap’ ka kham thiang ka kham bang ban ïa ka ‘eit’ lane ban ïa ka ‘pyut’ ka ‘syar’. Wat ka ‘dngiem’ ruh kam ju ïatai nia lane kam ju pyrshang pyngeit (convince) ïa u ‘shrieh’ ba ka khamthiang ka ‘um-ngap’ ban ïa ka ‘kait’.
To peit thuh bad bud ruh de ïa ka nuksa ka jong u ‘Kbeit’ lane u ‘Khlieng’. U ‘Khlieng’ um ibeiñ ïa ka bapli ka ‘Tyngab’. Tangba um (u Khlieng) ju pynsepei ïa la ka jong ka por bad ïa la ka jong ka bor ha kaba ïa bun ktien biej kab-shi-kab bad ka ‘tyngab’. U ‘Khlieng’, ynda haba u ibiej bad ilehrain ïa ka ‘jingpadieh’ than eh bad ruh ïa ka ‘jingkyntnied’ than eh jong ka ‘Tyngab’ u shu kaweh beit noh ïa la ki jong ki thapñiang bad kiew beit noh soit bad suki jai kham shatei shalor sha kaba ka bapli ka ‘Tyngab’ kam kotbor ba kan kiew.ñiar ba u ‘Khlieng’ lane ba u ‘Kbeit’ kin ïa shim bynta ha kino kino ki ‘drama’ jong ki ‘Tyngab’.
To ithuh shai ruh ba ki don kiba ym don mano mano ruh ba lah ban ‘hikai’ lane ban ‘pynsngewthuh’ ïa ki. Kiba ha ka ktien nongwei ki ong ki ‘un-teachable’. Kiba kum ban shu ong noh kiba phin nym lah ban pynsngewthuh ïa kiba kane ka ‘pyrthei’ ka dei kaba pyllun bad ba ka shad tawiar ïa ka ‘sngi’. Kiba namar kata kam bha ba phin ïatainia bad ki. Kiba kam bha wat ba phin pyrshang pynsngewthuh ïa kiba ki bapli ki don ïa ka bor sngewthuh kaba bakla. Kiba kam bha ba phin pyrshang pynbeit (correct) ïa ka jingbakla ka jong ki. Kam bha wat lada phi thmu ïa kata kaei kaei da ka jingieit bad da ka mynsiem kaba sngur. Napdeng jong ki ym duh ki ban shun pynban ïa phi. Kiba namar kata phi dei ban shu kum beit jak, khlem da sngew sammut, wat lada ki ong ba 1 + 1 = 11.
Kumta haba poi beit noh ha ka phang, kaba nga don jingmut’ ba ngam lahsngewthuh balei ba ki don bun kiba da sngewtynnat haduh katto katto ban ïatai-nia halor kata ka kam ‘die-met’. Ngam lah sngewthuh ba balei ba shu lynter tait ki ïa khana khadeh tang ïa kata ka kam ‘die-met’. Ka beiñ ka khoh lane ka kynnoh ka kynthoh ka jong ki ïa ki ‘thei die-met’ (lem bad ia kita ki ‘lady-boy’) pat de ruh kaba shaba palat liam. Kaba kumba ïalade ki dei kiba khlem kano kano ruh ka pop ka sang lane kiba ‘khuid’ kiba ‘suba’ lane kiba ‘janai’, ha baroh ki liang. Ka jingkren palat lane ka jingpynrem (condemnation) lane ka ‘attitude’ ka jong ki, ïa ki ‘thei die-met’ lem bad ïa ki ‘lady-boy’, kaba sngewmat ki long thik kum kita ki ‘Pharisees’ kiba ha ka por ka jong U Jisu Khrist. Kaba thik kum kaba kin ‘shulynthem maw beitnoh’ ïa kita ki ‘thei awria’ bad ïa ki ‘lady-boys’. Kiba namar kata ki don ïa ka jinglong kaba mar khongpong bad ka jinglong ka jong u JisuKhrist.
Khatduh ïawai, to tip bad to kynmaw ba yn nym don ‘thei die-met’ lada ym don ki ‘rang awria’ lane ki rang kiba kum uta u sim uba ki ong u ‘phiang-phiang-bam-sih’. Ki rang kiba brai ïa ka jingshakri kaba kyrpang ka jong ki ‘thei awria’. Kynmaw ba ym ju lah ban thapkti tang shiliangkti. To tip ba donkam arkti ban lah ban thapkti, kata, bad kti ka mon bad kti ka diang.
