New Delhi, Jymmang:
Ki la don haduh 47 lak tylli ki Cylinder Liquefied Petroleum Gas hapoh ka ri ba la pynpoi ha kylleng ka ri India ha ka shisngi, kaba ïahap bha bad ka jingbuh kot kumba 47.4 lak, la ong ka sorkar ha ka sngi Saitjaiñ, da kaba pynskhem ba kam don kano kano ka jingthut ha ka jingpynbiang watla ka don ka jingeh na ki jingïakynad ha West Asia, ong ka tyllong khubor.
Katkum ka jingong jong ka Ministry of Petroleum and Natural Gas, ka jingpynpoi LPG ka la neh wat haba ki jingsngewkhia ki la nang kiew halor ka jinglong jingman jong ka Strait of Hormuz. Ki heh sorkar ki la ong ba ka jingpynrung kyrteng online ka la poi sha ka 99 percent na ka jingdawa baroh kawei, kaba pyni ïa ka jingsam marbam kaba ïaid beit, la ïathuh ka tyllong khubor.
Ka sorkar ka la pynthikna ruh ba ym shym la don kano kano ka jingduna ha ki jaka sam LPG ha kylleng ka ri.
Ki bor synshar ki la ong ba ki sienjam kiba bun ki dang shim ban pynneh pynsah ïa ka jingshngaiñ ha ka bording, ka jingtreikam ha duriaw bad ka jingkyrshan ïa ki nongshong shnong jong ka ri India hapdeng ka jingkylla ha ka jinglong jingman ha ka thaiñ Sepngi Asia. Ka Centre ka la pynpaw biang ïa ka jingkular jong ka ban pynthikna ïa ka jingïoh umphniang kaba khlem jingthut ha kylleng ka ri, la ïathuh shuh shuh ka tyllong khubor.
Ban ïada na ka jingpyndonkam bakla bad ban pynthikna ïa ka jingsam kaba hok, ki bor pynjari aiñ ki la pynjur ïa ka jingtreikam pyrshah ïa ka jinglum jingtip bad ka jingdie marbam. Ka tnad ka la ong ba la pynlong palat 1,900 tylli ki jingkhynra ha kylleng ka ri ban tehlakam ïa ki kam beaiñ kiba ïadei bad ka jingsam LPG.
Ki heh sorkar ki la kdew ba kine ki sienjam ki long ban pynneh ïa ka jingshai bad ban pynthikna ba ki jingpynpoi kin poi sha ki nongthied khlem jingpynthut.
Ka sorkar ka la pynpaw ruh ïa ka jingkiew ha kaba pynïar ïa ki jingpynmih gas. Naduh u bnai Lber, la pyntreikam palat 6.04 lak tylli ki jingpynïasoh ïa ki pipe Natural Gas, katba la thaw ïa ki jingtei na ka bynta sa 2.68 lak tylli ki jingpynïasoh, kaba pynlong ïa ka jingkheiñ baroh sha ka 8.72 lak, ong ka khubor.
Ki kompeni pynïaid ïew umphniang paidbah ki la pynlong palat 10,100 tylli ki jingpynsngewthuh paidbah naduh basdang jong u bnai, Ïaïong, da kaba kyntiew ïa ka jingpyndonkam ïa ki umphniang kiba kham rit kiba long 5 kg. Kumba 1.75 lak tylli kum kine ki cylinder la die ha kane ka por, kynthup palat 3,700 tylli kiba la die lyngba palat 130 tylli ki camp ha ka shisngi.
Haba ai jingtip kaba thymmai halor ki laiñ pynpoi mar shabar ri, ka sorkar ka la ong ba ka lieng kit LPG MT Sarv Shakti ka ïaid suk lyngba ka Persian Gulf. Katei ka jhad, kaba kit palat ïa ka 46,000 ton ka LPG, la khmih lynti ba kan poi sha Visakhapatnam ha ka 13tarik, Jymmang, la ong shuh shuh ka tyllong khubor.
Katkum ka jingkheiñ jong ka Ministry of Ports, Shipping and Waterways, kane ka jhad kaba don ïa ka lama jong ka Marshall Islands, ka don ïa ki nongtrei kiba don haduh 20 ngut, ba kynthup ïa 18 ngut ki nong India.
Da kaba ki rukom pynpoi mar ki treikam bha bad ki lad pyntreikam ki don ha ka jaka jong ki, ki heh sorkar ki la ong ba ka rukom sam LPG jong ka India ka dang ïai neh wat hapdeng ki jingbym thikna ha ka jinglong jingman ha ka pyrthei kiba dang ïai bteng.
