New Delhi, Jymmang:
Ka sorkar pdeng ha ka sngi Ba-ar ka la pynbna ïa ka Emergency Credit Line Guarantee Scheme (ECLGS) ha ka jinglut kaba T.18,100 klur ban ai jingïarap ïa ki MSME bad ki kompeni liengsuiñ kiba la shah ktah na ka jingïakynad ha West Asia.
Ïa kane ka skhim, la khmih lynti ba kan ïarap ban ai ïa ka ram kaba kham heh kaba T.2.55 lak klur, kynthup ïa ka T.5,000 klur na ka bynta ki liengsuiñ, la mynjur da ka kynhun Myntri jong ka sorkar pdeng ha ka sngi Ba-ar.
Haba pynshai sha ki lad pathai khubor halor ki rai jong ka kynhun Myntri, u Myntri ka Information and Broadcasting u Ashwini Vaishnaw u la ong ba ka ECLGS 5.0, kaba don ïa ka jinglut kaba T.18,100 klur, kan ïarap ïa ki kompeni liengsuiñ bad kumjuh ïa ki MSME kiba shah ktah na ki jingïakynad ha West Asia.
Katkum ka jingong jong u Myntri, ki liengsuiñ kit nongleit nongwan kin ïoh haduh 100 percent na ka jingai jingmyntoi kaba long haduh T.1,500 klur katba ki jaka pule ki lah ban ïoh haduh 20 percent na ka pisa treikam ba la pynshong nongrim ha ka pisa haduh T.100 klur.
“Ïa kane ka skhim la wanrah ban weng ïa ka jingeh ha ki MSME bad ki liengsuiñ namar ka jingïakynad ha West Asia,” u la ong.
Ha ka jingpynbna paidbah, ka sorkar ka la ong ba kane ka skhim ka thmu ban pynlah ïa ki kam khañi ban tehlakam ïa ki jingeh kiba mih na ka jingïakynad ha West Asia.
“Nalor kata, la khmih lynti ba kane kan ïarap ïa ki kam khaïi ban pynneh pynsah ïa ki jingtreikam jong ki, ban ïada ïa ki kam, bad ban pynneh pynsah ïa ki jingpynbiang marbam. Ka skhim ai jingkular ram ba la tyrwa ka dei ka sienjam kaba kongsan ban ïarap ïa ki kam khaïi, khamtam eh ïa ki MSME bad ka tnad liengsuiñ, ban pynthikna ba ïa ki jingdonkam pisa treikam ba kham heh jong ki la pynbiang da ki bank bad ki jaka ai pisa,” la ong ka khubor.
Da kaba ai pisa ha ka por kaba biang, ka sorkar ka la ong ba kane ka skhim kan pynneh pynsah ia ki kam khaïi bad kan ïada na ka jingduh kam. Kan kyntiew ruh ïa ka jingpynmih mar hapoh ka ri khlem jingthut bad kan pynneh ïa ka jinglah ban neh jong ka mariang.
“Ka skhim ka thmu ban ai ka jingpynthikna ïa ka ram kaba 100 percent na ka bynta ki MSME bad 90 percent na ka bynta ki bym dei ki MSME bad kumjuh ruh ha ka liang ki liengsuiñ, sha ki Member Lending Institutions (MLI) da ka National Credit Guarantee Trustee Company Limited (NCGTC) na ka bynta ka pisa kaba la pyndap hapoh ka jingpynbna ba la pynjlan sha ki nongshim ram ban lah ban kyrshan ha ka por kaba lyngkot ki bym lah ban pynbiang ha kaba ïadei bad ka jingeh jong ka Asia Sepngi,” la ong ka jingpynbna.
Kan don ki kyndon ban ïoh ïa ki ram. Ka por na ka bynta ka tnad liengsuiñ kan long hynñiew snem naduh ka tarik ba la ai nyngkong, kynthup ïa ka jingpynsangeh kaba ar snem, bad na ka bynta ki MSME bad ki bym dei ki MSME, kan long san snem naduh ka tarik ba la ai nyngkong, kynthup ïa ka jingpynsangeh shi snem.
Kane ka skhim kan treikam na ka bynta baroh ki ram ba la mynjur ha ka por naduh ka tarik ba la pynmih ïa kine ki kyndon da ka NCGTC haduh ka 31 tarik u Lber jong u snem 2027.
U Myntri ka tnad liengsuiñ u K Rammohan Naidu u la ong ba ka ECLGS ka dei ka jingthmu kaba donkam bha, khamtam eh na ka bynta ka tnad liengsuiñ, kaba pynlah ïa ki liengsuiñ ban ïaid lyngba ïa ki jingeh ha ka liang ka pisa kaba lyngkot bad ban pynneh ïa ka jingtreikam kaba suk hapdeng ki jingpynthut ha ka pyrthei.
“Kan ai ka jingkyrshan pisa kaba khlaiñ ban ïada ïa ki kam, ban pynneh ïa ka jingïadei, bad ban pynthikna ïa ka jinglah ban ïeng ha ki sawdong sawkun jong kane ka bynta, katba ka kyrshan ruh ïa ki MSME,” u la ong ha ka jingthoh ba la phah ha ka rynsan X.
