Kane ka surok high class kaba jrong 166.8 km ei ei bad ka ban shongdor haduh Rs. 22.864 crore, ka dei ban pynkloi ïa ka lynti ïaid da ka kali na Guwahati sha Silchar na ka 8 kynta sha ka 5 kynta. Kane ka surok ka dei ka jingsngewieid u PM Modi ïa u CM ka Assam, bad khyn-diat ïa u CM ka Meghalaya.
Tang ban pynthame ïa u paid hynñiewtrep, kawei pat ka kyrteng jong kane ka surok ka long ka “Guwahati – Shillong – Silchar Express Way.” Bad ba ki engineer Central ki kob ba kane ka surok kan pynkloi ïa ka jingleit jingwan na Guwahati sha Shillong. ñiuma, kane kam long satia kumta. Namar na Guwahati sha Shillong yn pyndonkam beit da ka surok 4 lane ba don mynta haduh Mawlyngkhung (ICAR). Te kumno keiñ kan pynkloi ïa ka jingleit/jingwan na Guwahati sha Shillong. Ha Mawlyngkhung kan sdang kane ka surok bah, bad ka Mawlyngkhung kan long ka junction/station ba heh bah, ban ïa kiew ïa hiar ki briew. Lada ka long kumta tharai, ka lah ban pynlong ïa kane ka jaka kum ka lynti ban ioh rung suk ki bar jylla sha ri jongngi. Kane ka dei ka buti jong ka sorkar BJP ban pynrit paid ïa ki trai muluk (bring about a demographic change). Kumta ka leh donbor ha Kashmir ban phiah lyngkhot lyngkhai ïa ka Kashmir bad ban knieh noh ïa ki hok jong ki trai muluk.
Ka jingjrong jong kane ka surok ka long 166.8km bad ka jingnoh synñiang ki paid Khasi – Jaiñtia na ka bynta kane ka surok ka long haduh 144.8km, tang 22 km yn noh synñiang u paid Assamese. Hato kata kaba lah ban long ? Na ka bynta jong ka suk ka sain jong ki, u paid khasi bad jaiñtia u hap ban ai ïa la ki lyngkha ki pung dohkha, ki ïing ki sem na ka bynta kane ka surok. Don ki bynta jong kane ka surok kiba lehse ki hap ban iaid najrong ki ïing jong-ngi. Hooid, ki bor sorkar ki ong ba kin ai ka pisa na ka bynta ki jaka ba ki shim. Hynrei kaba isynei ka long ïa ka Mei Ramew ka ban shah ot, shah tih da ki bor machine ba pyniaid da ki bar jylla ki bym sngewthuh ne don jingieit ïa ka Mei Ramew. Ka Mei Ramew kan siew kylliang da ki lad ba ka don, kumta ka la leh ha surok Shillong – Dawki. ïa ngi ki trai ki trai muluk ngi mynjur mo ba ki bar jylla kin wan leh donbor. Te haba kane ka surok kan phai da shibun eh ïa u paid Assam bad khyndiat ïa u paid Khasi – Jaiñtia, khamtam naduh ba orpait ka jingkieng dam, te balei ym sdang ïa kane ka surok bah hapoh la ka jong ka jylla Assam, bad pynïaid ïa ka na Guwahati sha Jagi Road bad ter ter haba kut hiar sha Silchar. Ka sorkar Assam, ka mat mait ïa la ka jong ka Mei – Ramew. Ngi shane ngin pyndonkam beit kumba ngi ju leh tang da ka 4 lane ba don mynta ngi lah biang palat.
Mr. E. Wahlang
