Moscow, Jymmang:
Katkum ki khubor, la iathuh ba ki shipai jong ka China, ki la pyntbit rieh ïa kumba 200ngut ki shipai jong ka Russia, ha China ha kaba kut jong u snem ba la dep bad katto katne, naduh katei ka por, ki la wan phai biang ban leit iakhun ha Ukraine, katkum ki lai tylli ki tnat syntiat jong ka ri Europe bad ki kot ki sla, kiba la iohi da ka Reuters.
Katba ka China bad ka Russia ki la pynlong bun tylli ki jingïalehkai shipai lang naduh ba ka Moscow ka la hiar thma pura ïa ka Ukraine ha u snem 2022, ka Beijing ka la pynpaw bunsien ba ka long kaba pdeng ha ka jingïakynad bad ka pyni ïalade kum ka nongpynïasuk ïa ka jingsuk.
Ia ki jinghikai ba rieh, kiba la pynleit jingmut kham bunsien ha ka jingpyndonkam ïa ki drone, la batai ha ka jingiateh ba ar ktien hapdeng ka Russia bad ka China, kaba la iasoi da ki heh ophisar jong ka Russia bad China ha Beijing ha ka 2 tarik u Naitung, 2025.
Katei ka jingiateh, kaba la bishar bniah da ka Reuters, ka ong ba kumba 200ngut ki shipai jong ka Russia, kin shah hikai ha ki jaka shipai ha ki jaka ba kynthup ïa ka Beijing bad ka nongbah Nanjing, kaba don shaphang mihngi. Ki tyllong khubor ki la iathuh ba haduh kane ka jingkhein hadien la shah hikai ha China.
Ka jingiateh ka la ong ruh ba da ki spah ngut ki shipai China kin leit shah hikai ha ki jaka shipai ha Russia.
Da kaba hikai ïa ki shipai Russia ha ka kyrdan treikam bad buit treikam kiba nangta ki iashim bynta ha Ukraine, ka China ka kham don bynta beit beit ha ka thma ha ka dewbah Europe ban ïa kaba la tip mynshwa, la ong uwei u heh shipai.
Ka tnat iada ri jong ka Russia bad China kim shym la jubab ïa ki jingkyrpad ban ai jingmut halor ki jingtip ba bniah ba la kdew ha kane ka jingthoh.
“Halor ka jingeh jong ka Ukraine, ka China ka la ïai bteng ïa ka jinglong kaba thikna bad kaba khlem liang bad ka la trei ban kyntiew ïa ka jingïakren ïasuk, kane ka long kaba ïaid beit bad kaba shai bad la sakhi da ki ri ka pyrthei,” ong ka tnat bar ri jong ka China ha ka jingpynbna sha ka Reuters. “Ki liang kiba iadei kim dei ban thmu ban pynmih ïa ka jingialeh pyrshah ne ban pynkylla ïa ka jingkynnoh.”
Ki tnat wad bniah ki la kren da ka kyndon ba kim dei ban pynpaw kyrteng khnang ban iakren ïa ki jingtip kiba kongsan.
Ki ri kiba khlain bor jong ka Europe, kiba iohi ïa ka Russia kum ka jingma kaba khraw ïa ka jingshngain, ki la peitngor bha ïa ka jingiadei kaba nang iajan hapdeng ka Russia bad ka China, ka ri kaba ar ha ka ioh ka kot ha ka pyrthei bad ka paralok khaii pateng kaba kongsan jong ka European Union.
Ki ar tylli ki ri ki la pynbna ïa ka jingïatreilang kaba khlem pud” katto katne sngi shwa ka jinghiar thma jong ka Russia ïa ka Ukraine ha u snem 2022 bad ki la kular ban pynlong ïa ki jingïalehkai shipai ban pyntbit ïa ka jingïatreilang hapdeng ki shipai jong ki. Katba ki ri Sepngi ki dang pyrshang ban pyniakhlad ïa ka Russia, ka China ka la ai ka lad jingim da kaba thied ïa ka umphniang, ka gas bad u dewiong jong ka.
U Xi Jinping, nongïalam ka China, u dei ban pdiang sngewbha ïa U President ka Russia, U Vladimir Putin ha ka Sngi Ba-ar bad Sngi Balang , tang hapoh shi taiew duna hadien ba u riew pawkhmat jong ka America, U Donald Trump, ula wan jngoh ïa katei ka Ri.
Ka China bad ka Russia ki la buh ïa ka jingleit jong u Putin – ka jingwan kaba 25 jong u sha China – kum ka sakhi ba kham bniah ïa ka jingïatreilang jong ki “ha baroh ki jinglong jingman”, wat haba ki ri Sepngi ki kyntu ïa ka Beijing ban pynbor ïa ka Moscow ban pynkut noh ïa ka thma jong ka ha Ukraine.
