Hyderabad, Jymmang:
Ha kaba ïadei bad ka bynta kaba lah ban long ka sienjam kaba kongsan kaba nyngkong eh jong ka sorkar ban pynbeit ïa ki jingsiew ba la shim da ki skul jong ki riew shimet bad ki skul jong ki kompeni, ka jingthmu jong ka aiñ pynbeit bad buddien ïa ka bai skul shimet jong ka Telangana ka lah ban long ba yn sa shim ha ka jingïalang jong ka kynhun Myntri kaba la buh ban long ha kine ki sngi.
Kumba la pynwan dur da ka Telangana Education Commission (TEC) hapoh ka jingïalam jong u Akunuri Murali, Chairman jong ka Commission, kane ka Bill ba la tyrwa ka thmu ban khanglad ïa ka jingkiew ka bai skul ha ki skul jong ki riew shimet haduh 8% shisien man ka ar snem.
Ka ai jingmut ruh ban thaw ïa ka bor pynïaid katkum ka aiñ bad ka tyrwa ban pynshitom haduh 10 lak tyngka ïa ki skul kiba pynkheiñ ïa ki kyndon ba la buh.
Napdeng ki jingai jingmut ba kongsan ka long ban khanglad ïa ka jingkiew bai skul sha ka 8% man la ka ar snem ha ka jaka ban pynkiew ar shah man la u snem. Ka draft ka tyrwa ruh ban thaw ïa ka Riti synshar jong ka tnad pynïaid bad peit bniah ïa ka bai skul jong ki skul ki riew shimet jong ka Telangana, kaba la khlieh da u nongbishar barim jong ka kashari ne ka ïingbishar ba hakhliehduh.
Ka komishon ka la ai jingmut shuh shuh ban phiah ïa ki skul katkum ki jingtei, ki jingdonkam bad ka jinglut jingsep ba shisha ha ka jingtreikam ban tip ïa ki jingsiew ba shisha bad kiba ïadei dur.
Ka la tyrwa ruh ban pyntreikam ïa ka 25% ka Reservation na ka bynta ki khynnah skul kiba wan na ki longïing baduk hapoh ka jingtreikam ka Right to Education Act.
Ha ka jingpyrshang ban tehlakam ïa ka jinglum pisa beaiñ, ka Bill ka tyrwa ban khang ban shim pisa shuh shuh ha ka kyrteng jong ki jingai sngewbha, ka pisa pynroi ne ki bai siew bapher bapher. Ban pynbha ïa ka jinglong kaba shai bad ka jingkitkhlieh, baroh ki jaka pule shimet ruh kin hap ban thaw ïa ki seng jong ki kmie ki kpa bad ki nonghikai.
Ki tyllong khubor ba thikna ki ïathuh ba ka TEC ka la aiti ïa kane ka draft Bill sha ka sorkar jylla ha u snem ba la dep, hynrei ka dang sahteng. Hapdeng ka jingsngewkhia kaba nang jur halor ka jingkiew dor jong ki skul shimet, kane ka jingtyrwa ka lah ban mih ban ïakren ha ka jingïalang jong ka kynhun Myntri ban wan, ki la ong.
Ki seng jong ki kmie ki kpa bad ki nongïakhih ban pynïoh ïa ka hok ha ka pule puthi ki la kynnoh ba katto katne ki jaka pule ki dang bteng ban pynkiew dor bha ïa ka bai skul bad ki jingsiew bapher bapher, ha kaba la ïathuh ba ki don ki skul kiba la pynkiew ïa ka bai skul haduh 30% mynta u snem.
