Vijayawada, Nailur:
Kum shi bynta ban pynpaw ba u kwah ba baroh ki MLA kiba mihkhmat ïa ka NDA kin shah jied biang ha ka elekshon 2029, u heh nongïalam jong ka seng TDP uba dei ruh u Myntri Rangbah ka jylla u N Chandrababu Naidu u la ong ba u pyndonkam ïa ka jingleit jngoh jong u sha ki konstitwensi ym tang ban batai ïa ka jingtreikam jong ki tnad bapher bapher hynrei ban ai jingmut ruh sha ki MLA. “Nga la leh kumjuh ha ka por ba nga leit sha Narasapuram”, u la ong.
U Myntri Rangbah u la pynthikna ïa ki MLA ïa ka jingkyrshan jong ka sorkar ban ïarap ïa ki ban kiew kum ki nongïalam bad kyntu ïa ki ban pynkhlaiñ ïa ka jingïadei jong ki bad ki paidbah bad ki nongtrei jong ka seng.
Ha ka jingïakren halor ki prokram ai jingmyntoi ha ka jingïalang jong ki nongïalam ka TDP ha ka ophis treikam jong ka seng ha kine ki khyndiat sngi ha Mangalagiri, u Naidu u la ong ba ka sorkar synrop ka ai ïa ki jingmyntoi ha ka rukom kaba kham heh ban ïa ka sorkar barim.
U la ong ba ka Thalliki Vandanam ka ai jingmyntoi ïa ki 67 lak ngut ki samla pule, katba ka Annadata Sukhibhava ka ai jingmyntoi sha ki 47 lak ngut ki nongrep.
