Bengaluru, Nailur:
U Myntri Rangbah ka jylla Karnataka u DK Shivakumar u la ong ba yn pynrung shuh shuh ïa ki Taluk ha ka thup jong ki jaka ba shah ktah ha ka jingkyrduh um bad ka sorkar kan ithuh ïa ki jaka ki bym shym la ïoh slap haduh 21 sngi lynter. U la ong ba katkum ki khubor, ki thaiñ ki kham bun ki bym ïoh slap.
U la ong ba yn sa shim ïa ka rai katkum ki kaiphod ban ai da ki kynhun kiba stad bad shemphang halor kane ka bynta.
Haba kren sha ki lad pathai khubor hajan ka Devanahalli ha Bengaluru, u Myntri Rangbah u la ong ba ka jylla ka mad ïa ka jingtyrkhong kaba jur bha. “Ngin sa pynbna ïa ka jingkyrduh um katkum ki kaiphod jong ka saïan bad ka jingstad.
Yn leh ha ki ar ne lai bynta. La khmih lynti ba kin kham bun ki taluk kiba la buh kyrteng,” u la ong.
U la ai jingmut ruh ïa ki MLA ba kim dei ban khuslai lada ki taluk jong ki kim shym la pynbna ba ki la shah ktah ha ka jingkyrduh um. Ka sorkar jylla kan leh ïa kane da ka jingstad saïan.
“U Symbud Myntri Rangbah bad u Revenue Minister u Dr G Parameshwara u dang ïoh ïa ki kaiphod bad ngi la ïakren ïa kane. Baroh ki Taluk ym lah ban pynbna ba ki shah ktah ha ka jingkyrduh um ha ka shisien pynbna, hynrei yn sa leh ha ka rukom ba la buh kyrpang,” u la ong.
U Myntri Rangbah u la ong ruh ba ki la khot ïa ka dorbar thaw aiñ kaba kyrpang ha u bnai Nailur ban ïakren ïa ki jingeh jong ki nongrep.
“Ngin sa pule bniah ïa ka jinglong jingman da ka saïan, ïoh ïa ka jingpeit bniah ïa ka jingshisha jong ki jaka ba shah ktah ha ka jingkyrduh bad ai jingïarap ïa ki nongrep kiba don ha ka jingeh,” u la bynrap.
Kumba ka long mynta, ka sorkar jylla ka dang khmih bniah ïa ki jingdonkam na ka bynta ban lah ban ïakhun bad ban weng ïa ki jingeh kiba ki nongshong shnong ki lah ban ïakynduh na ka jing-rang tyrkhong.
