Bangkok, Jylliew:
Ha kane ka jingjia, la ong ba ki nongshong shnong ka thaiñ Northeast jong ka Myanmar, ki la sakhi ïa ka jingbthei kaba jur ha kawei ka iingmala kaba don ha katei ka thaiñ, ha kaba 45 ngut ki la duh ei noh ïa la ka jingim.
Kumba 70 ngut kiwei pat, la ong ba ki la shah ktah lang bad ki la mynsaw jur na katei ka jingbthei kaba la jia ha ka por kumba shiteng sngi, ha ka shnong Kaungtup jong ka Namhkam.
Katei ka jaka, kaba jngai kumba 3 kilomitar (2 mail) na ka liang kaba shaphang shathie na khappud jong ka China, ka don hapoh ka jingpeit jong ka Ta’ang National Liberation Army, ka kynhun shipai riewlum, kaba la ialeh pyrshah ïa ka sorkar pdeng jong ka Myanmar.
Uwei u nongpyllait im uba la hiar mar mar sha katei ka jaka ba jia ka jingbthei bom, u la ïathuh ha ka The Associated Press ba haduh ka janmiet jong ka Sngi U Blei la sei ïa 46 tylli ki metïap ba kynthup ïa 6 ngut ki khynnah bad la rah ïa ki ban thang ïa ki. U nongpyllait im, uba la kren khlem da kwah ban pynpaw kyrteng namar ki daw jong ka jingshngain, u la iathuh ba la pynkit ïa 74 ngut ki briew kiba mynsaw sha ka hospital jong ka sor bad ka jingpyllait im ka dang iaid shakhmat.
Uwei pat u nongpyllait im ha Namhkam, uba la kren ruh khlem da kwah ban pynpaw kyrteng, u la iathuh ba kumba 40 ngut ki briew ki la iap bad palat 100 tylli ki iing kiba don hajan katei ka jaka bthei ki la julor.
Ki lad pathai khubor jong ka Myanmar, kynthup ïa ka tnat pathai khubor online jong ka Shan State, Shwe Phee Myay, ki la ïathuh ba ki briew kiba la ïap ki long naduh 50 haduh 55 ngut.Ki la pynmih ïa ki dur bad ki video kiba pyni ïa ka tdem kaba mih na ka jingbthei bad ki jingtei kiba la shah pynjulor bad ki jingtwa ha ka jingbthei jong ka.
Ka tnat pathai khubor jong ka sorkar China, ka la iathuh ba katei ka jingbthei, ka la wanrah ïa ka jingiap bad jingmynsaw, ha kaba bun ki iing sah ki la shah pynjulor jur, hynrei, kam shym la ai jingkhein.
Ka la iathuh ba katkum ka jingtohkit ba nyngkong, katei ka jingbthei ka dei ha ka jaka ba la buh ïa ki tiar pynbthei kiba bun bha kiba la pyndonkam na ka bynta ki kam tih mawshun.
Ki bor synshar shnong mynta ki dang ai jingiarap, jingsumar bad jingiarap ban pynkynriah jaka ïa ki nongshong shnong kiba shah ktah, ong ka kaiphod.
Ka Ta’ang National Liberation Army, lane ka TNLA, ha ka kyrwoh kaba la pyllait lyngba ka Telegram Channel jongka, ka iathuh ba ïa ka gelignite, la buh da ka tnat kamai jong katei ka kynhun, na ka bynta ban pyndonkam ha ki jaka tih bad ki jaka tih maw, bad ba ka jingtohkit ïa ka daw jong katei ka jingbthei, ka dang iaid shakhmat.
Ia ka Gelignite la pyndonkam bha ha ka jingtih mawshun bad ka jingpynbthei maw, hynrei ka lah ban kylla long kaba sniew bha katba nang mih ki sngi bad lada ym buh bha ïa ka.
Ka Ta’ang National Liberation Army, lane ka TNLA, ka dei ka dkhot jong ka kynhun lehnoh Three Brotherhood Alliance, bad ka la synshar ïa ka thain Namhkam, naduh ba katei ka kynhun bad ki paralok jong ka, ki la sdang ïa ka jinghiar thma kaba jur pyrshah ïa ki shipai ha ka thain shatei lam mihngi jong ka Myanmar, ha kaba kut jong u snem 2023. ka jingsynshar hi.
Ka TNLA ka la iasoi ïa ka jingsangeh iasiat bad ki shipai jong ka Myanmar hadien ka jingiakren kaba la pynlong da ka China ha u bnai Lber jong u snem ba la dep, tangba ka jingiadei ka dang iai bteng.
Ka Myanmar ka la don hapdeng ka jingkulmar naduh ba ki shipai ki la kurup ïa ka bor synshar na ka sorkar ba la jied jong ka Aung San Suu Kyi ha ka 1 tarik u Rymphang jong u snem 2021, kaba la pynmih ïa ka jingpyrshah paidbah kaba la saphriang bha. Hadien ba la pynduh ïa ki jingiakhih kiba suk da ka bor pyniap briew, bun ki nongpyrshah ïa ka jingsynshar shipai ki la shim tiar, bad ki bynta kiba heh jong ka ri mynta ki la shah rong noh ha ka jingialeh.
