Tokyo, Jylliew:
Ka tnat embassy jong ka Pakistan hapoh Japan, ka la kiar ban kren eiei shaphang ka jingplie jong ka Pakistan ia kawei ka jaka mane ‘Muslim’ hapoh Kawagoe, hadien ba ki bor pyniaid ka Japan ki la pynrem halor katei ka jingleh jong ka Pakistan namar ki ong ba ia katei ka jaka mane, la pynieng bad tei be-aiñ khlem ka jingioh jingbit na ki bor ba dei khmih jong katei ka ri.
Kane ka mosque, kaba don ha Kawagoe ha Saitama Prefecture, ka ieng ha ka jaka kaba heh 4,500 square meter, kaba la khein kum ka jaka khlaw lum. Ka jaka ka hap hapoh ka jaka ba la tehlakam ia ka jingkylla sor, ha kaba la khang pyrshah ban tei lymda la ai jingbit kyrpang da ki bor synshar shnong.
Katkum ka kaiphod jong ka The Asahi Shimbun, ki kot ki sla jong ki jaka ki pyni ba ka jaka ka la kylla kti ha u Lber 2025, da kaba kynriah na ka kompeni die jaka kaba don ha Fujimi sha ka kompeni kaba la pynrung kyrteng ha ka jaka sah jong ka Kawagoe.
Ki heh jong ka nongbah Kawagoe, ki la ong ba la tei ia katei ka mosque khlem da ioh ia ka jingpynbna kaba donkam.
“Ïa kane ka jingtei (mosque) la tei ha ka jaka ba la tehlakam ïa ka jingpynroi sor ha kaba la khang pyrshah ïa ka jingtei lymda la ïoh ïa ki jingbit ba kyrpang katkum ka aiñ shna sor,” la ong ka sorkar municipal ha ka kyrwoh ba pawnam. “Ia ka iing kaba la kdew la shna khlem ka jingbit jong ka sor.”
Katei ka mat, ka la khring ia ka jingpyrkhat, namar ba u nongmihkhmat jong ka Pakistan, ha Japan, U Abdul Hameed, u la leit sha ka jingplie ia katei ka mosque, ha kaba sdang jong une u snem.
Ka Asahi Shimbun ka iathuh ba ka Yashio Masjid ka la iatreilang la slem bha bad ki bor synshar shnong bad ki nongshong shnong. Ka mosque ka la sdang ban treikam ha ka karkhana ba la pynkylla dur ha u snem 2000 bad la pynrung kyrteng pura ïa ka kum ka seng niam ha u snem 2007.
Ha kine ki snem, ka la pynneh ia ka jingiadei bad ki nongshong shnong da kaba iasam jingtip bad ki seng ba marjan, pyntip sha ki nongshong shnong shwa ki jingjia kiba kongsan kum ki jingrakhe Eid bad shim bynta ha ki jingpynkhuid shnong.
