New Delhi, Jylliew:
Hapdeng ki lai tylli ki jingjia ba sngewsih kiba la jia ha ka por bym poi pyrkhat ba la jia marbud ha ka nongbah, ka Municipal Corporation of Delhi (MCD) ka la pyntreikam pyrkhing bad da kaba tyngeh ïa ki jingtei ba khlem ïoh jingbit ha kylleng ki jaka jong ka Municipal naduh ka 1 tarik u Jylliew.
Katkum ka jingbatai bniah jong ka Municipal, la ong ba ki la don kumba 82 tylli ki jingdon jingem kiba la shah pynjulor bad 43 tylli ki jingdon jingem ki la shah khang pyndonkam.
Ïa kane ka jingkhang bad ka jingpynpra, la pynlong da ki kynhun jong ka MCD, ba la ïarap da ki pulit ka Delhi. Ka Civic body ka la pynlong ïa ka jingpynpra ïa ki 12 tylli ki jaka namar ba ki la pynkheiñ ïa ki aiñ shna ïing ha ka South Zone. Sa 14 tylli ki jaka ha ka South Zone la khang ha kane ka jingpynbna. Ha ka Civil Lines Zone, la pynpra ïa ki 7 tylli ki jaka, katba ha ka Narela Zone la pynpra 8 tylli ki jaka beaiñ.
Ka MCD ka la ithuh ruh palat 12 tylli ki ïing sah B&B kiba treikam ha kaba pynkheiñ ïki aiñ shna ïing ha Hauz Rani ha ka jingjurip lang jong ka MCD bad kiwei kiwei ki tnad. Haduh 32 tylli ki jaka ha Saidulajab bad 9 tylli ki jaka ha ka jingpynheh Khirki ruh la ithuh ba ki treikam pynkheiñ ïa ki kyndon ha ka por ba leh ïa ka jingjurip.
Ha kane ka jingïaid paidbah kaba la long ha ka sngi Thohdieng, la khang tala ïa 5 tylli ki B&B Guest House ha Hauz Rani.
Kine ki Guest House ki kynthup ïa ka Green Residency, ka Sky Inn, ka Flourish Inn, ka Venue Inn bad ka Mikasa Inn. Shuh shuh, ki dang thmu ban pynpra bad khang pyrshah ïa ki 32 tylli ki jaka ha Saidulajab bad 9 tylli ki jaka ha ka jingpynheh ïa ka Khirki.
Ïa ki jaka la buh hapoh ka jingpeitngor kaba man ka por ban ithuh ïa kino kino ki jingtei khlem jingbit bad ki ïing sah B&B kiba pynkheiñ ïa ki kyndon.
Nalor kata, ha ki thaiñ Savitri Nagar, Sainik Farm bad Khanpur la pynpra bad khang pyrshah ïa ki 3 tylli ki jaka. Ryngkat bad kata, la khang pyndonkam ïa 3 tylli ki kamra namar ba ki pynïaid ïa ka Library da kaba pynkheiñ ïa ka aiñ ha Gautam Nagar.
Kumba ka long mynta, ka MCD ka la pynmih ruh palat 150 tylli ki jingpynbna shna ïing khlem jingbit, ki jingpynbna ban khang bad ki hukum pynpra pyrshah ïa ki jaka namar ka jingpyndonkam bakla ïa ki jaka bad ka jingpynkheiñ ïa ki aiñ shna ïing ha baroh ki zone.
Kumjuh ruh ka tnad ka koit ka khiah jong ka bor jong ka sor ha ka Rohini Zone ka la pynlong ruh ïa ka jingpynjari aiñ kaba jur pyrshah ïa ki kam khaïi bym don jingbit kiba treikam ha kaba pynkheiñ ïa ki kyndon ai license.
