Bengaluru, Jylliew:
U Priyank Kharge, uba long u Myntri ka tnat ki kam pohïing, u la bthah ïa ki heh pulit, ba kin pynmih ïa ki jingpynbna sha baroh ki Pub, Breweries, Bar, Club, Lounge, Restaurant bad kiwei kiwei ki jaka ba ai kyiad, da kaba bthah ba ki dei ban pyrkhing bha ïa ka jingrung bad ai kyiad sha ki khynnah kiba dang rit ka rta.
U Myntri u la bthah ïa ki pulit ban kheiñ ïa ka jingdih kyiad jong ki khynnah rit ym tang kum ka jingpynkheiñ ïa ka License, hynrei kum ka jingeh ïa ka jingshngaiñ jong ki samla bad ka koit ka khiah jong ki paidbah.
“Ki khynnah bad ki samla ki dei ban ïoh jingïada na ka jingdih kyiad bad jingdih buaid. Ki jaka khaïi kim lah ban buh ïa ka jingmyntoi halor ka jingshngaiñ bad ka lawei jong ki samla jong ngi. Ka kyndon ka long kaba suk, ha kaba ym don ID, ym dei ban rung. Kano kano ka jaka kaba pynshlur ïa ki khynnah rit ban dih kyiad kan ïakynduh ïa ka jingpynshitom kaba tyngeh,” la ong u Kharge. “Ym shah ïa uno uno u briew ban rung sha ki jaka die kyiad, ki jaka shna kyiad, ki bar, ki club ne ki jaka ai kyiad khlem ka jingpynshisha ïa ka rta kaba biang.”
Ki jaka treikam ki dei ban pynshisha ïa ki jingithuh ba la ai da ka sorkar shwa ban ailad ban rung ne ai kyiad.
Kano kano ka jaka ba la lap ba ka ai kyiad sha ki khynnah kiba dang rit ka rta ne kaba pynshlur ban dih kyiad hapoh ka rta yn pynshitom da kaba tyngeh katkum ka aiñ kaba treikam.
Ki trai, ki nongpynïaid, ki nongbat license bad ki nongpynïaid ïa ki jingïalang kin kitkhlieh ïa ki jingpynkheiñ hapoh ki jaka jong ki. Pynthikna ba ka CCTV rung ka treikam bad la buh ïa ka ha ka por ba la buh kaba duna tam ban pynshisha ïa ka jingbud ryntih ha ka por ba tohkit. Ki pulit kin ïatreilang ruh bad ki jaka pule, ki kmie ki kpa, ki seng kiba ai jingïarap ïa ki nongshong shnong bad ki kynhun nongshong shnong ban ïada na ka jingshah ktah ha ki khynnah rit ha ka kyiad, duma bad ki jingdih pynbuaid,” ong u Myntri.
Ka Karnataka kan shim ïa ka rukom treikam kaba pyrkhing, “Ka jingbthah ka bud ïa ka jingsngewkhia kaba nang kiew halor ka jingdih kyiad bad jingshah ktah ha ki jingdih buaid ha ki khynnah rit hapdeng ki samla bad ki samla rangbah ha Bengaluru.
Dang shen ka jingwad bniah ba la pynlong hapdeng 4,093 ngut ki samla pule jong ki PU Courses, UG colleges bad ha ki skul Higher Secondary ha kylleng ki saw tylli ki jaka pule kiba don ha Bengaluru la shem ba uwei na ki lai ngut ki khynnah pule ha ka nongbah ki la shah ktah ha ka liang ka koit ka khiah na ka daw jong ka jingdih kyiad, duma bad kiwei pat ki jingdih jingbam kiba ktah ïa ka met.
Ïa kane ka jingwad bniah la pynlong da ki nongwad bniah na ka St. John’s Medical College, Bengaluru; CHRIST University, Bengaluru; bad Kasturba Medical College, Manipal.
Ka jingwad bniah ka pyni, 33% na ki samla kiba la kham san kiba la shah kylli ki dih kyiad, katba haduh 18% ki dei kiba la ngop ha u duma, kaba kham bun bha ban ïa ka jingdon jong ki nongdih duma ha ka ri baroh kawei kaba long 8.7% na ka bynta u duma bad 7.9% na ka bynta ka jingdih kyiad.
Ka rta kaba dang khie jong ka jingsdang ban dih kyiad hapdeng ki samla Bengaluru ka long 17 snem, ha kaba don kiba la pyntip ba ki sdang naduh ka rta kaba 8 snem,” la bynrap biang u Myntri ka tnat ki kam pohïing.
