Vijayawada, Jylliew:
Ka rukom sam sboh da kaba shu online jong ka Andhra Pradesh Agricultural Input Management System (APAIMS) kaba la sdang da ka sorkar jylla ban pynsuk ïa ka rukom sam sboh, bad ban khanglad ïa ka jingpynïaid shawei bad jingpyndonkam bakla ïa ka sboh urea, ka la ïoh ïa ka jingkynthoh kaba jur bha na ki nongrep ha kaba 46,830 byrni ki nongrep ki la thied ïa ka sboh hapdeng 2,58,144 byrni ka sboh hapdeng ka 8 tarik, Jylliew bad 13 tarik, Jylliew.
Ka Nandyal ka la paw kum ka distrik kaba ha khlieh duh ha ka Jylla da kaba die 64,142 tylli ki byrni sboh, bud sa ka Nellore kaba 45,436 byrni bad ka Kurnool kaba 39,555 byrni.
Ka Krishna bad ka Kakinada ki don shabar jong ka jingpyntreikam mynta ïa ka rukom treikam namar ba ki ar tylli ki distrik ki wan hapoh ka jingpeit jong ka prokram pyndonkam sboh kaba dei jong ka sorkar pdeng.
Ïa kane ka rukom pyntreikam kaba thymmai la wanrah ban pynthikna ba ïa ki sboh ba la mut na ka bynta uwei u jingthung ym dei ban pynkylla sha kiwei pat. Kane ka jingthmu ka long ruh ban ïada na ka jingpyndonkam bakla ïa ka urea na ka bynta ki kam bym dei jong ka rep katba dang pynthikna ïa ka jingdon jong ka jingpyndonkam kaba biang sha ki nongrep.
Ka Andhra Pradesh ka la kylla long ka Jylla kaba nyngkong eh ha ka ri ban pyntreikam ïa ka polisi die sboh da kaba pyndonkam da ka app ha kylleng ki 26 tylli ki distrik, kaba pynlah ïa ki nongrep ban thied ïa ki sboh na u nongkhaïi ne jaka die sboh ba ki kwah ha ka rukom kaba shai bad kaba suk.
Haba pynbeit ïa ki jingeh ba la pynpaw da ki katto katne ki nongrep, ka tnad rep ka la pynshai ba ïa ka Webland bad ka e-Crop databases la dep ban pynïasoh lang bad ka aplikeshon, bad ba kino kino ki jingtip ba bniah halor ka jingrep kiba la jah lah ban pynthymmai mardor lyngba ka Rythu Seva Kendra lane ka ophis Mandal Agriculture ba dei khmih.
Kumjuh ruh ki nongrep ba shong wai kin ym donkam ïa ka jingpynshisha da ka OTP ne jingbit na ki trai jaka. Hadien ka jingpynshisha ha ka jaka, yn pynrung ïa ki jingtip ba bniah jong ki ha ka system, kaba pynlah ïa ki ban thied ïa ki sboh kum kiwei pat ki nongrep.
Ïa ka jingai sboh na ka bynta ki jingthung jingtep la pynshong nongrim ha ki jingai jingmut jong u Acharya NG Ranga Agricultural University. Lada don ki jingdonkam ba kham bun kiba mih namar ka jinglong ka suiñbneng ne ki jingdonkam jong ki jingthung, yn sa leh ïa ki jingpynkylla kiba biang ban pynthikna ïa ka jingpynbiang kaba biang ïa ki mar rep.
Katkum ka jingkheiñ ba thikna, ka jingdie lum lang ha ki hynriew sngi kaba long 2,58,144 byrni ki sboh kynthup ïa 1,88,229 tylli ki byrni sboh urea bad 69,915 tylli ki byrni sboh DAP. Ki heh sorkar ki la ong ba kane ka rukom ka la pynlah ban buddien ha ka por ba shisha ïa ka jingsam sboh, bad pynthikna ba ki stok kin poi sha ki nongrep ba shisha katkum ka jingdonkam jong ki jingthung.
Ki heh ka tnad rep ki la pynlong ïa ki jingïalang lyngba ka durkhih ba kyrpang bad ki nongmihkhmat jong ki seng ki nongkhaïi sboh bad ki nongdie bad shalan ïa ka.
“Ïa ka rynsan jong ka APAIMS la wanrah tang ban ïada ïa ka jingmyntoi jong ki nongrep bad ban pynthikna ba ki sboh kin poi sha ki nongrep ba shisha khlem da pynslem. Kam donkam satia ban don ka jingkhuslai ne jingkulmar jingmut. Manla iwei pa iwei i nongrep in ïoh ïa ka sboh ba la mang bad ha ka dor kaba la buh ryntih ha ka por ba biang, bad ka osrkar ka la nang pynïaf bad pynsuk ïa ka rukom sam sboh sha ki jaka ba la buh,” la ong u Manazir Jeelani Samoon, Commissioner of Agriculture.
