Bhopal, Jylliew:
Ka Ïingkashari jong ka Madhya Pradesh High Court ha ka sngi Balang ka la weng noh ïa ka jingpynsangeh shipor halor ka hukum kem ba la pynmih pyrshah ïa u MP ka Trinamool Congress u Abhishek Banerjee ha ka mukotduma pynjah burom, kaba la pynphai kylla ïa u National General Secretary jong ka seng.
U Justice Pramod Kumar Agarwal u la weng noh ïa ka jingkyrpad jong u Banerjee bad pynlait noh ïa ka jingpynsangeh ba la ai ha u bnai Naiwieng, 2025 halor ka jingpyntreikam ïa ka hukum ba la pynmih da ka ïingbishar ba kyrpang jong ka MP-MLA ha Bhopal.
Ïa kane ka mukotduma pynjah burom la mudui ha u snem 2021 da u MLA barim ka Indore, u Akash Vijayvargiya, uba dei u khun jong u heh nongïalam jong ka seng BJP bad uba dei ruh u Myntri sorkar, u Kailash Vijayvargiya. Ka jingujor ka la kynnoh ba u Banerjee ka la kdew ïa u Akash Vijayvargiya kum u “runar” ha ka jingïalang paidbah ha Kolkata ha u Naiwieng, 2020.
Hadien ba la pynmih ïa ka hukum kem da ka ïingbishar MP-MLA, u Banerjee u la rah sha ka ïingbishar bahakhlieh duh, da kaba kynthoh ba u dei u dkhot jong ka Parliament bad um lah ban phet rieh. Da kaba leh halor katei ka jingkyrpad, ka High Court ka la pynsangeh noh ïa ka jingpyntreikam ïa katei ka hukum ha ka 12 tarik u Naiwieng jong u snem ba la dep.
Ha ka jingbishar ha ka sngi Balang, ym shym la don mano mano ba wan mih na ka bynta u nongujor. Da kaba shim khia ïa ka jingbym don, ka ïingbishar ka la ïohi ba ka paw ba u nongujor u la duh jingkyrmen ban bud ïa ka kam.
Hadien kata ka kynhun nongbishar ka la pyllait noh ïa ka jingpynsahteng, ka la weng noh ïa ka jingujor bad ka la bthah ba dei ban phah ïa ka kopi jong ka hukum jong ka sha ka ïingbishar jong ka Bhopal.
La khmih lynti ba katei ka rai, kan nang pynjur shuh shuh ïa ki jingeh jong u Banerjee ha ka aiñ, namar ba u dang mad ruh ïa ka jingtohkit jong ka Enforcement Directorate, halor ka kam bamsap.
