Vijayawada, Jylliew:
Ka sorkar Andhra Pradesh, ka la poi ha ka bynta kaba thymmai ha kaba ïadei bad ki kam shna ïing ha kine ki ar snem ba ladep, da kaba pyndep ïa ki 4.5 lak tylli ki ïing bad aiti sha ki nongïoh jingmyntoi, katba sa 4 lak tylli ki ïing ki dang don hapdeng ka jingshna.
Haba kren sha ki lad pathai khubor ha ka sngi Palei, u Myntri ka Housing and Information u Kolusu Parthasaradhi u la ong ba ka jingthmu ba hakhmat eh jong ka sorkar ka long ban pynurlong ïa ka jingangnud jong kawei pa kawei ka longïing kaba duk ban ïoh ïa ka ïing, ban pynthikna ïa ka shongsuk shongsaiñ ha ka imlang sahlang bad ban pynbha ïa ka jingim.
U la kdew ba ka ïing kam dei tang ka jaka sah hynrei ka dei ka nongrim na ka bynta ka jingshngaiñ ha ka ïoh ka kot bad ka burom. Da kaba tei halor ka jingïohi jngai jong u NT Rama Rao ba la khlad noh, u Myntri Rangbah ka jylla, u N Chandrababu Naidu, u la pynïar ïa ki prokram shna ïing ban kynthup ïa kawei pa kawei ka longïing kaba dei hok. Nalor ka jingpyndep ïa ki projek kiba la sahkut, ka sorkar ka la pynmih ïa ki skhim thymmai ban pynthikna ba kan ym don kano kano ka longïing kaba tbit kaba sah khlem ïing.
U Parthasarathi u la pynkynmaw ba hapdeng u snem 2014-2019, ka Jylla ka la ai jingbit ïa ki 8.04 lak tylli ki ïing, ha kaba ka jinglut jingsep jong ki unit la buh ba kan long T.1.5 lak ha ki jaka nongkyndong bad T.2.5 lak ha ki jaka sor. Ka Jylla ka la wanrah ruh ïa ka NTR Housing Scheme wat shwa ka PMAY, kaba ai ïa ki ïing kiba bha ïa ki SC, ST, BC, ki rit paid, bad kiwei kiwei ki bynta kiba wan na ki longïing kiba kyrduh. .
U la kynthoh ïa ka sorkar barim kaba la pynsangeh ïa ki projek, kaba la pynsangeh ïa ki 4 lak tylli ki iing, bad kaba la bat ia ka pisa 995 klur tyngka na ka bynta ki 2.73 lak tylli ki ïing kiba la dep shna, kaba la ktah ïa palat 7.5 lak tylli ki longïing kiba duk. Kumta, bun ki longïing ki la hap ban iehnoh ïa ka jingtei ha pdeng lynti, khamtam eh hapdeng ki jaidbynriew kiba rit paid.
Naduh ba ka sorkar synrop ka la shimti ïa ka kam, u Naidu u la bthah ïa ki heh sorkar ban pynsted ïa ki projek kiba dang sahteng.
Hapoh ar snem, la pyndep 4.5 lak tylli ki ïing, bad sa 4 lak tylli ki dang ïaid shaphrang stet bha. Ban pynduna ïa ka jingeh ha ka liang ka pisa tyngka, ka sorkar ka la pynjlan shuh shuh ïa ka jingïarap kaba T.50,000 sha ki SC, ST, BC, bad ki longïing rit paid.
