Mumbai, Jylliew:
Ha ka jingpynbor kaba khraw ban poi sha ka jinghikai ba la pynïaid da ka teknoloji, ka Maharashtra School Education Department ka la ïasoi ïa ka Letter of Intent (LoI) bad ka Google for Education ban pynbiang ïa ki Artificial Intelligence (AI) bad ki Digital Technology Training sha ki nonghikai ha kylleng ka jylla.
Hapoh kane ka jingthmu, palat saw lak ngut ki nonghikai kin ïoh jinghikai lyngba ka Google AI Educator Series ha kine ki 18 bnai ban wan.
Ïa kane ka LoI la soi ha Mantralaya ha ka jingïadonlang u Myntri ka tnad pule puthi u Dadaji Bhuse. Ïa kane ka Letter of Intent la ïasoi da u Chris Phillips, Vice President jong ka Google dor Education, ha ka kyrteng jong ka Google, bad u Joint Secretary u Tahsildar ha ka kyrteng jong ka School Education Department.
Ha kane ka prokram la leit ban ïashim bynta da u Principal Secretary ka School Education Department u Ranjitsinh Deol, Joint Secretary Mr. Tahsildar, Google na ka bynta u heh ka tnat Education u Sanjay Jain bad kiwei pat ki heh sorkar bad kiba la shahjied.
Haba kren ha kane ka jingïalang, u Bhuse u la ong ba ka tnat pule puthi ka dei ban ïaid ryngkat ryngkat bad ki jingkylla stet jong ka teknoloji.
“Ka jingpynbiang ïa ki nonghikai da ki sap ba mynta ka la kylla long ka jingdonkam jong kane ka juk jong ka Artificial Intelligence bad ka Digital Technology,” u la ong.
Hapoh kane ka prokram, ki nonghikai ba tbit ba la jied kin leit shwa ha ka jinghikai ba kyrpang. Nangta kine ki nonghikai kin ai jinghikai ïa ki nonghikai ha kylleng ka Maharashtra, ban pynthikna ba ka jingtip kaba ïadei bad ka AI kan poi sha ki skul ha baroh kawei ka jylla.
U Bhuse u la ban jur ruh ba kane ka jingthmu kan ym buh jingeh ei ei ha ka liang ka pisa tyngka ïa ka sorkar jylla namar ba ïa ka prokram ai jinghikai baroh kawei yn ai khlem jingsiew da ka Google.
U la ong shuh shuh ba la buh ïa ki lad jingiada ban ïada ïa ka jingshngaiñ Digital jong ki nonghikai bad ba ka sorkar Maharashtra kan dang bat ïa ka jingpeit bniah ïa kane ka jingtreikam baroh kawei.
U Myntri ka State for School Education u Dr. Pankaj Bhoyar u la ong ba kane ka jingïatreilang kan ïarap ïa ki nonghikai ba kin ïoh ïa ka jinghikai kaba long ha ka kyrdan pyrthei ha ka phang kaba la nang kham kongsan ha ka pule puthi jong ka juk mynta.
“Lyngba kane ka jingïatreilang bad ka Google for Education, da ki lak ngut ki nonghikai ha ka jylla kin ïoh ïa ka jinghikai kaba kham shalor,” la ong u Bhoyar.
U la bynrap ba kane ka prokram ha kaba kut kan ai jingmyntoi ïa ki khynnah skul ruh kumjuh bad kan ïarap ban wanrah ïa ka jingpynsngewthuh kaba kham bha shaphang ka Artificial Intelligence ha kylleng ki skul.
