Ahmedabad, Jylliew:
Ki pulit jong ka Gujarat kiba dei khmih halor ki kam runar ha ka kompiwtor ki la pyntroiñ ïa ka kam thok jong ki nongthep pisa hapdeng ki jylla kaba la kynnoh ba ka la thok ïa ki nongbei tyngka halor ka jaka khaïi pateng thok bad ka pisa Crypto, da kaba kular ban ïoh ïa ka jingmih kaba phylla.
Ka jingpyntroiñ kaba la thmu ïa ki nongbei tyngka ha kylleng ki ri ka la paw pyrthei hadien ba la ïathuh ba uwei u nongujor uba sah ha Gujarat u la duhnong palat T.19 lak.
Ka Dr. Lavina Sinha kaba long ka Ahmedabad Cyber Crime Deputy Commissioner, u Assistant Commissioner u Hardik Makadiya bad ka Cyber Crime Police Station ki la pynlong ïa ka jingtohkit kaba bniah halor kane ka jingujor.
Ka jingtohkit ka la pynpaw ïa ka kynhun lehthok lyngba ka cyber kaba la pynbeit ryntih kaba kham heh kaba treikam ha kylleng ka jylla bad ki pud jong ka pyrthei.
Katkum ka jingong jong ki nongtohkit, u nongmudui u la shah khring ha katei ka skhim hadien ba u la peit ïa ki durkhih ba la pynbna ïa ka jingkhaïi Foreign Exchange (Forex) kiba la saphriang ha ki jaka online bapher bapher.Ki durkhih ki la pyni ïa ka jingkhaïi Forex kum ka lad ban bei tyngka kaba lah ban kamai bha bad ki la bthah ïa ki nongbei tyngka kiba lah ban leit sha ka jaka khaïi kaba la tip kum ka WinProFX.
Da kaba ngeit ïa ki jingpynshisha, u nongujor u la sdang ban thep pisa lyngba ka platform da kaba pynkylla ïa ka pisa crypto ha ka dur jong ka USDT.
Ki pulit ki la ong ba ha kaba sdang kane ka platform ka pyni ïa ka jingmyntoi kaba khraw ha ka Dashboard khaïi jong u nongbei tyngka, kaba la pynmih ïa ka jingmutdur jong ka kam khaïi kaba jop, kaba pynshlur ïa ki nongbei tyngka kiba kham bun. Hynrei haba u nongujor u la pyrshang ban sei ïa ka jingmyntoi bad ka trai ba la thep, ym shym la pynphai satia.
Ka jingïakren na ki nongpynïaid ïa ka platform ka la sangeh suki suki, kaba la pynlong ïa u nongbei tyngka ban ym lah ban ïoh biang ïa ka pisa jong u.
Ki nongtohkit ki kynnoh ba ki briew kiba shah kynnoh, kiba leh kum shi bynta jong ka jingthmu ha ki kam runar ba la thmu lypa, ki la thmu ban ïoh ïa ka jingshaniah jong ki nongbei tyngka bad ki la pynlong ïa ki ban bei tyngka kham heh lyngba ki jingpynbna ba lamler.
