Bhubaneswar, Jylliew:
Ka sorkar jong ka jylla Odisha ha ka sngi Ba-ar ka la pynbna ïa ka jingai sngewbha kaba kham heh kaba long T.10 lak na ka bynta ki longïing jong ki nongbylla sngi na Odisha kiba la duh noh ïa la ka jong ka jingim ha ka jingjia jong ka jinglait jong ka Ammonia Gas kaba la jia ha Tamil Nadu, wat haba san tylli ki metïap la pynkit sha ki shnong trai jong ki kiba don ha Keonjhar na ka bynta ka jingleh niam ba khatduh.
Kitei kiba la khlad noh ki dei kiba la tip kyrteng kum u Gumani Juanga jong ka shnong Rangamatia, Shibani Juanga bad Geeta Juanga jong ka shnong Dubanali kaba hap hapoh ka jingkhmih jong ki pulit ka Telkoi bad Phulomani Juanga jong ka Kodipasa bad Champabati Juanga jong ka Tala Champei kaba hap hapoh ka jingkhmih jong ki pulit ka Sadar. Kine baroh ki lanot ki dei na ka jaitbynriew Juanga ka Particularly Vulnerable Tribal Group (PVTG).
U Myntri Rangbah ka jylla u Mohan Charan Majhi u la ai khublei khatduh ïa kine ki lanot ha ka kad liengsuiñ Biju Patnaik International Airport (BPIA) shwa ban pynkit ïa ki met ïap da ki kali ba kyrpang sha Keonjhar.
Ka Ophis treikam jong u Myntri Rangbah ka Jylla ka la ong ba u Majhi u la sngewsih jur halor kane ka jingjia bad u la pynkiew ïa ka jingïarap pisa kaba na ka T. 4 lak sha ka T. 10 lak.
Ki khubor na kylleng ki la pynbna ba ka jingïap jong ki briew ha kane ka jingjia kaba la jia ha ka sngi u Blei ha ka shnong Kannigaipair jong ka Tiruvallur distrik jong ka TN ka la kiew sha ka 9 ngut hadien ba kawei pat ka samla ka la khlad noh na ka jingmynsaw jong ka ha ka sngi Ba-ar.
U Labour Commissioner u Indramani Tripathy u la ïathuh ha ki lad pathai khubor, ba ïa san tylli ki met ïap la pynkit da ka liengsuiñ hadien ba la pyndep ïa ka jingpynshisha bad kiwei kiwei ki kam. Ka jingpynshisha ha ki ar tylli kiwei pat ki dang ïaid shakhmat.
U Tripathy u la ong ba ka kynhun kaba don lai ngut kiba la phah da ka sorkar jylla ban ïatreilang bad ki bor pynïaid ka Tamil Nadu ki dang sah ha katei ka jaka bad ki dang ïarap ban ithuh ïa ki nongtrei kiba la khlad bad kiba la mynsaw kiba dang shah sumar ha ki hospital bapher bapher. Kumba 30 ngut ki nongbylla kiba la mynsaw na Odisha ki dang shah sumar mynta ha ki hospital bapher bapher ha Tamil Nadu, u la ong.
Ki heh jong ka tnad ki la kam ba ka jingduna jong ki jingdon ki briew ha ka jaka ka la ktah ïa ka rukom ban ithuh ïa ki. Hynrei ki la ong ba dang pyrshang ban pynsuk ïa ka jingwanphai jong kito kiba kwah ban leit phai sha ka jylla.
“Namar ba la buh ïa ki metïap ha ki jaka bapher bapher bad ki nongpang kiba mynsaw ki dang shah sumar ha ki hospital bapher bapher, ban pynïaid beit ïa kiei kiei baroh ha madan ka la long kaba eh. La phah kyrpang ïa uwei u heh sorkar sha Chennai ha ka lah sngi U Blei ban pynïaid bad wanrah biang ïa ki metïap jong kiba la khlad noh,” ong u Labour Commissioner.
