Bengaluru, Jylliew:
Kumba la buh jingkheiñ, la ong ba ki la don baroh kumba 18 ngut ki nongbylla ïa kiba la shah pynshisha ba ki la shah pynbor ban trei ha ka jaka shna maw it hapoh ki jinglong jingman kiba pynshitom beiñ la ïoh pyllait im da ki pulit, ki heh ka Revenue bad ki nongtrei mon sngewbha ha ka shnong Bevanahalli jong ka thaiñ T Narasipura kaba don ha Mysuru distrik ha ka lah sngi U Blei.
Ha kaba ïadei bad kane ka jingjia, la kem ïa lai ngut ki trai jong ka jaka shna maw it.
Kine kiba la shah kem ki dei kiba la tip kyrteng kum u Yathiraj, u Girish bad u Mahadev, kiba la bat mraw ïa kitei ki lanot da saw haduh 20 snem kynthih. Na kitei ki briew kiba la ïoh ban pyllait im, 16 ngut ki dei na ki shnong ba marjan, katba arngut ki dei na Vellore distrik kaba ha Tamil Nadu.
Kane ka jingpyntreikam ha ka ban pyllait im la pynlong da ki ophisar na ka District Legal Services Authority, ha ryngkat ki tahsildar bad ki nongmihkhmat na ka tnad Labour, ka tnad Women and Child Development bad ki pulit. Ki seng trei mon sngewbha ka Vikasana bad ka Madilu ki la wanrah ïa kane ka kam sha ki bor ba dei peit.
Ka la don ka jingujor ejahar ha thanat pulit jong ka Bannur ha Mysuru katkum ki kyndon jong ka aiñ Bonded Labour System (Abolition) Act, ka aiñ SC/ST (Prevention of Atrocits), bad ki kyndon 143 (Trafficking of Persons0, 127, 74, bad 115 jong ka Bharatiya Nyaya Sanhita.
Baroh kiba lait im la buh ha ka jaka sah ba la pynbeit da ka bor synshar distrik.
Uwei pa uwei na ki u don hok ban ïoh ïa ki kot pynlait bad ka jingsiew bai lutksan kaba T.30,000 na ka bor synshar hapoh 48 kynta hadien ba la pyllait im.
Kane ka mukotduma ka la paw pyrthei hadien ba ki shijur ki la lait phet na ka jaka shna maw it ha ka sngi Thohdieng jong ka taïew ba la lah, kiba la ieh ïa arngut ki khun shynrang jong ki ha kane ka jaka trei.
Kitei ki arngut ki la phet krad sha ka ïing jong uwei u bahaïing hasem ha Mysuru hadien ba ki la shah thombor bunsien bad jur bha ha ki trai jong kane ka karkhana.
Hynrei ha ka sngi U Blei, ki trai ki la wad ïa ki, ki la wanrah jubor ïa ki sha ka jaka treikam, ki la thombor biang ïa ki bad ki la set ïa ki ha kawei ka kamra, ha kaba ki la shah set tad haduh ka jingshah pyllait im jong ki.
Ka longïing ka la pdiang ïa ka boina kaba T. 75 hajar na u nongpynïaid kam 8 snem mynshwa bad naduh katei ka por ka la trei ha katei ka jaka.
Ki arngut ki khun jong ki kiba dang 9 bad 13 snem ka rta ruh ki la shah pynbor ban trei kam. Katba u khynnah uba kham rit u leit skul, la bthah ïa u ban trei shwa bad hadien ka por long skul.
Ka longïing ka trei naduh ka por 5 baje mynstep haduh 6 baje janmiet man la ka sngi bad ryngkat ki kamai T.500-1,000 shi taïew, kumjuh kum kiwei pat ki longïing ha kane ka jaka treikam.
U nongpyntreikam u pynbiang ïa u khaw ha ka dor T.30 shi kg bad ïa kane ka jinglut la ot na ka bainong jong ki man ka taïew. Na ka bynta kiwei pat ki jingpynbeit, tang uwei u shynrang jong kawei ka longïing la shah teng teng ban mih na ka jaka.
Ym shah ïa ki longïing ban mih lang na ka jaka trei ne leit jngoh ïa ki ïing ki sem bad kiba haïing ha sem, wat na ka bynta kino kino ki jingdonkam jong ka ïing ka sem ruh.
Wat la ki la trei da ki snem hapoh kine ki jinglong jingman, ki nongpyntreikam ki la kyntait ban pyllait ïa ki nongtrei, da kaba dawa ban siew biang ïa ka pisa ba la ai lypa ryngkat bad ka sut kaba heh bha.
Ki nongtrei kiba kyrpad ban mih noh ne kiba pynpaw ïa ki jingsngewkhia shaphang ka kam jong ki, ki ju shah pynshitom beiñ ha ka met, kynthup ïa ka jingshah shoh da ki dieng.
Katto katne ngut na ki ki ju shah pynmynsaw, kane ka la pynlong ïa ki ban shem jingeh ban ïaid.
