Thiruvananthapuram:
Ka jingïakhun jong ka tnat ki kam pohïing halor u drok ka la wanrah ïa ka jingjop. Kumba la sakhi, la ong ba tang hapoh ki lai taïew jong ka jingpyntreikam kaba la sdang naduh ka 2 tarik, Jylliew, ïa kaba la tip kum ka ‘Operation Toofan, ka jingleit khynra ïa ki nongdih drok’ ka la pynlong ïa palat 3,000 ngut ban shah kem ha kylleng ka Kerala.
Haba wanrah ïa ki jingkheiñ kaba la long naduh ka 2 tarik u Jylliew haduh ka 17 tarik Jylliew ha ka Ïingdorbar ha ka sngi Ba-ar, u Myntri ka tnat ki kam pohïing u Ramesh Chennithala u la ong ba ki don 3,176 ngut ki briew kiba la shah kem ha ki 2,954 tylli ki jingjia namar ka jingdon ïa ki jingdih pynbuaid ba la khang pyrshah ban pyndonkam. Ka jingtip ba dang shen jong ki pulit kaba la long naduh ka 2-23 tarik u Jylliew, ka la pynpaw ïa ki jingkheiñ kiba kham kiew bha ha kaba 3,931 ngut ki la shahkem ha ki 3,657 tylli ki kam ba ïadei bad u drok. Katba 1.8kg (1813.758g) u drok MDMA bad 333.693kg u Ganja la ïoh ban kurup ha katei ka por ba la pyntreikam ïa ka jingkhynra kaba la ïaid da 21 sngi.
“Ka jingdih drok ka jyllei bha ha Kerala, bad ha ki por ka kham sniew shuh shuh ban ïa kaba don ha Punjab. Kane ka pyni ïa ka jingdonkam ban don ka jingïatreilang kaba palat ïa ka jingïapher jingmut ha ka saiñ pyrthei”, la ong u Chennithala ha ka ïingdorbar, da kaba bynrap ba kan ym don kano kano ka jingïapynbeit ne ka jingwan tuklar jong ka saiñ pyrthei ha ki mukotduma ba ïadei bad u drok.
U la ong ba la bthah ruh ïa baroh ki MLA ba kin ïashim bynta ha ka jingrakhe ïa ka sngi pyrshah ïa ka jingdih drok bad ka jingkhaïi beaiñ ïa u drok kaba hap ha ka 26 tarik, Jylliew, ha kawei ka skul ha la ki jong ki jong ki konstitwensi.
Haba ïakren bad u IG (North Zone) u Putta Vimaladitya uba dei u Nodal jong ka jylla Toofan u la ïathuh ha ki nongthoh khubor ba kane ka jingthmu ka la ïoh ïa ka jingkyrshan kaba bha na ki nongshong shnong.
“Ki briew na kylleng ka jylla ki ai jingmut ïa ngi lyngba ki jingkhot bad ki khubor WhatsApp, kaba pynpaw ïa ka jingnoh synñiang jong ki ban pynkut noh ïa ka jingma jong u drok,” u la ong.
“Ka jingmih kaba ai mynsiem ka dei nyngkong eh namar ka jingïatreilang jong ki bynta bapher bapher jong ka shipai, kynthup ïa baroh ar ki kynhun wad bniah bad ki kynhun treikam ha kylleng,” ong u Vimaladitya.
