New Delhi, Jylliew:
Ka kynhun Enforcement Directorate (ED) ha ka sngi Balang ka la pynlong ïa ka jingkhynra ha ki san tylli ki jaka kiba don ha kylleng ka nongbah Delhi kum shi bynta ban tohkit ïa ka pisa ba la kamai bymhok halor ka kam khaïi drok ha ka kad lieng Mundra ha u snem 2021, ong ki heh pulit.
Kane ka kynhun ka la leit ban khynra, ïa ka jaka jong u nongkhaïi uba sah ha Delhi, u Harpreet Singh Talwar, uba la tip ruh da ka kyrteng kum u Kabir Talwar, uwei u briew uba kyrteng kum u Shamshudeen bad katto katne ngut kiwei pat kiba la shah pynngat ha ka Prevention of Money Laundering Act (PMLA), la ïathuh ki heh ka kynhun ED.
Ka kynhun ED ka la buh jingmudui ïa kane ka thok pisa ha u snem 2021 bad ïa ki jingwad bniah ba khatduh la pynlong halor ki jingtip bathymmai, kynthup ïa ki jingkynnoh ba ïa ka pisa ba la ïoh na ka jingkhaïi drok la thep ha ki katto katne ki jaka leh sngewbha ha Delhi.
Ha kawei na ki jingïoh kurup drok ba heh tam ha ka pyrthei, ka Directorate of Revenue Intelligence ka la ïoh ban kurup haduh 2,988.21 kg u drok ba wan na Afghanistan na ka kad lieng Mundra ha ka Kutch distrik jong ka Gujarat ha u bnai Nailur, 2021.
Kine ki song ki la kot sha ka T. 21,000 klur ha ki ïew bar ri, kiba la poi sha rud duriaw ka India lyngba ka Iran, ba la pynkylla dur kum ki maw talc ba la pynkhreh shiteng.
Ka kynhun NIA, kaba la tohkit kyrpang ïa kane ka kam, ka la ong ha ka jingkynnoh jong ka, ba ïa ka jingmih na katei ka jingkhaïi drok, la pyndonkam ban bei tyngka ïa ki kam jong ka seng lehnoh, kaba la shah ñiew beaiñ, kaba don ha Pakistan, ka Lashkar-e-Taiba.
Ka tnad ka la batai ïa katei ka jingshalan kum ka jingpyrshang ban pynpoi tuh ïa u drok sha India hapoh ka jingtap jong ka jingwanrah mar kaba long katkum ka aiñ.
