Hyderabad, Jylliew:
U nongïalam ka seng BRS bad u Myntri barim u T Harish Rao, ha ka shithi ba la phah sha u Myntri Rangbah ka jylla u Revanth Reddy ha ka sngi Balang, u la kyntu ïa ka sorkar ban ïada ïa ka bhah ba dei hok jong ka Telangana ha ki um jong ka wah Tungabhadra bad ban khanglad ïa ka Karnataka ban ïaid shakhmat bad ki projek kiba lah ban ktah ïa ka jingdonkam um ha ki jaka rep bad ka umbam umdih jong ka jylla.
U la ong ba ki projek kiba la shim da ka Karnataka sharum jong ka Rajolibanda Diversion Scheme (RDS) kin pynduna shibun ïa ka jingtuid ka um sha Telangana, kaba ktah ïa ka jingai um hapoh katei ka skhim bad buh ïa ki hajar ngut ki nongrep ha ka jingma.
Haba pynpaw ba ki paidbah ka Palamuru ki la ïakhun na ka bynta ka hok um da ki phew snem, u Harish u la ong ba kin ym sngap jar lada ki jingmyntoi jong ki ki shah ktah. Ban ïada ïa man la ka shijaw jong ka um ha Telangana ka dei ka kamram jong ka sorkar jylla, u la bynrap.
Haba kynnoh ba ka sorkar Congress kam shym la lah ban ïada ïa ki jingmyntoi ha ka liang ka um jong ka Telangana, u la ong ba ka la sngap jar katba ka Karnataka ka dang ïaid shakhmat bad ki projek halor ka wah Tungabhadra.
U nongïalam jong ka BRS u la pan jingshai ruh hato ka Telangana ka la mynjur beit beit ïa ka jingthmu jong ka Kurdi Lift Irrigation Scheme ka Karnataka bad ka Chikkalaparvi bad Chikkalamanchi Bridge-cum-Barrages, bad hato ka jing pdiang na ka bynta ka jingpyntreikam ïa Kodangal Lift Irrigation Scheme ka la long ka jingïoh jingmyntoi kaba neh jong ka jylla ha ka liang ka um.
U la buh jingkylli shuh shuh balei ba ka sorkar kam shym la pyrshah ïa ki projek jong ka Karnataka watla kam shym la don ki jingmynjur ba donkam na ka Central Water Commission (CWC), ka Krishna River Management Board (KRMB) bad kiwei kiwei ki tnad treikam.
Haba kynnoh ba ka Karnataka ka la dep pyndonkam ïa ka um palat ïa ka bhah ba la mang hapoh ka RDS, u Harish u la ong ba kano kano ka projek thymmai kan nang pynduna shuh shuh ïa ka bhah jong ka Telangana.
U la bynrap ba ka jingktah kan ïaid shabar jong ka RDS, kan ktah ïa ka jingtuid um sha ka pung Srisailam, ki projek sam um, bad ki jingdonkam ha ka umbam umdih ha ka lawei.
