Bengaluru, Jylliew:
U Myntri ka tnad pynroi jong ka Bengaluru, u Krishna Byre Gowda, u la ong ba kumba la sakhi, ki la don kumba 1,000 tylli ki jingjia aksiden ha ki surok, kumba la ïoh jingtip ha Bengaluru, 30% na kiba ïap, ki dei ki briew kiba ïaid kjat, bad ïa kum kine ki jingïap, lah ban ïada lyngba ki lynti ïaid kjat kiba shngaiñ.
U Gowda u la ong ba ïa kane ka pisa yn pyndonkam ban maramot kumba 2 hajar km ki lynti ïaid kjat kiba hap hapoh ka jingpeit jong ki san tylli ki corporation. “La bthah ban pyndep kloi ïa ki kam pynbha kiba donkam, kynthup ïa ki slab, ki maw bakhlaiñ, bad ki jingïapher ha ka kyrdan.”
Na ka bynta kane, yn sdang ïa ka ‘Safe Footpath Campaign’ hadien ka 1 tarik u Naitung bad ka jingtreikam kaba kot sha ka T.70 klur yn pynïaid ha kane ka jingthmu, ong u Myntri ha ki nongthoh khubor hadien ba la pynlong ïa ka jingïalang ban bishar bniah ïa ka jinglong jingman bad ka jingshah ktah ha ki lynti ïaid kjat. Ha kane ka jingïalang la leit ban ïashim bynta da u Chief Commissioner jong ka Greater Bengaluru Authority (GBA) u M Maheshwar Rao, ki commissioner jong ki san tylli ki city corporation, u Joint Commissioner of Traffic Police u Karthik Reddy bad kiwei kiwei ki heh ophisar ki la ïashim bynta ha kane ka jingïalang.
U Myntri u la ban jur ba ki lynti ïaid kjat ki dei ki jingdon jingem jong kumba 1.5 klur ngut ki briew ha kane ka nongbah, bad ki trai dukan kim dei ban tuklar ïa ki lynti ïaid kjat. “Ka jingshna ïa ki lynti ïaid kjat kiba shngaiñ ka dei ka jingdawa jong ki paidbah la slem bah, baroh ki dei ban burom ïa ka hukum jong ka Supreme Court bad ban ïatreilang ha kaba pynkhuid ïa ki jaka ba pynwit halor kane ka jingthmu”, u la ong.
Ka Supreme Court ka la pynshai ba ka jingïaid ha ki lynti ïaid kjat ka dei ka hok tynrai jong uwei pa uwei u nongshong shnong bad ka la bthah ïa ki Local Body jong baroh ki jylla ba kin pyntreikam ïa kane.
“Ka kam ban pynkhuid ïa ki jaka ïaid kjat kan ïaid beit ïaid ryntih ha kylleng ka sor. Bun ki dukan ki buh ïa ki mar jong ki, ki jingthoh kyrteng bad kiwei kiwei ki tiar ha ki lynti ïaid kjat, kaba wanrah jingeh ïa ki paidbah.Namarkata, la ailad ïa ki trai dukan ban pynkhuid da ka mon sngewbha ïa ki jaka ïaid kjat haduh ka 1 tarik, Naitung. Lada kine ki dukan ki dang bteng ban pynwit ïa ki lynti ïaid kjat, ka Corporation kan sa pynkhuid hi bad ban pyntreikam da ka kuna kaba heh katkum ki kyndon,” u la ong.
U Myntri u la maham ba lada ki kali ki pynïeng ha ki lynti ïaid kjat da kaba pynkheiñ ïa ka hukum jong ka Supreme Court yn tan noh ïa ki.
“Naduh ka 1 tarik u Naitung la bthah ïa ki heh sorkar ba kin buh ïa ki notice sticker ha ki kali kiba ïeng harud surok ha kylleng ka nongbah, yn ai por 7 sngi hadien ba la dep buh ïa ki sticker, lada ym lah ban weng ïa ki kali wat hadien kane ruh yn sa tan bad die lilam ïa ki naduh ka 10 tarik u Naitung, ” u la ong.
