Mumbai, Jylliew:
Kat kum ka jingthoh ba la samlang da u MP jong ka UBT Sena u Sanjay Raut, la ong ba u Uddhav Thackeray un sdang ïa ka jingïalap paidbah ha ka 27 tarik u Jylliew ha ryngkat ka jingleit jngoh jong u sha Yavatmal, bud sa ka Washim ha Vidarbha bad sha Hingoli ha ka thaiñ Marathwada.
Kumba la pynbeit la ong ba ha ka 28 tarik, un leit sha Parbhani bad Dharashiv, bud sa ka jingleit jong u sha Shirdi ha ka 29 tarik, Jylliew.
Hapdeng ki jingkheiñ ba kan don ka jingïakhih ha Shiv Sena (UBT), u heh jong ka seng, Uddhav Thackeray, u thmu ban sdang ïa ka jingïalap paidbah ha baroh kawei ka jylla Maharashtra, ban ïakynduh ïa ki nongbud jong ka seng, ha ki konstitwensi, kynthup ïa ki jong ki MP ba pyrshah seng.
U MP ka Yavatmal-Washim u Sanjay Deshmukh, u MP ka Hingoli u Nagesh Patil Ashtikar, u MP ka Parbhani u Sanjay Jadhav, u MP ka Shirdi u Bhausaheb Wakchaure, u MP ka Mumbai North East u Sanjay Dina Patil, bad u MP ka Osmanabad u Omprakash Raje Nimbalkar ki dei kiba la ïaidlait ban don bynta ha ka jingïalang jong ka seng Sena (UBT) ha ïingdorbar bad ki lah ban leit pynïasoh bad ka kynhun seng Shiv Sena ba la lamkhmat da u Eknath Shinde.
Katba kane ka dang jia, u Uddhav Thackeray ha ka Sngi U Blei u la leit jngoh ïa ka ophis jong ka UBT Sena ha Bhandup West bad ha Ghatkopar ha Mumbai bad ïakren bad ki nongbud jong ka seng.
Haba kynthoh pyrshah ïa u Sanjay Dina Patil bad kiwei kiwei ki MP pyrshah seng, u Thackeray u la kynnoh ïa ki ba ki la “die” ïalade.
“Watla ki ïakynduh ïa ka jingshah shet kylla bad shah die ki MP, ki Shivsainik ki dang ïeng skhem. Nga kwah ban panmap namar ba nga la kyrpad ïa phi ban jied ïa u nongshet kylla. Nga la ïalap elekshon ha baroh ki Lok Sabha Constituency. Nga la ai tiket ïa u (Sanjay Dina Patil). U la pynkhraw ïa ka jingbuh jong ka jingshahjied, bad hadien u la die noh ïalade. Kane ka bynta ka long kaba ap jingma,” u la ong.
Haba pynphai biang ïa ka jingkyrshan jong ka seng ïa ka Congress, une u heh ka UBT Sena u la bynrap, “Hato don mano mano ba tip mano ba dei u president ka BJP? Em. Ha kawei ka sngi, uwei na ka Congress un long president jong ki. Ki la ong Congress Mukt Bharat, hynrei ka dei ka BJP Yukt Congress.”
Katba u Sanjay Patil u don napdeng ki nongpyrshah seng, ka khun jong u, ka Rajool Patil, ka la ïakynduh ïa u Uddhav Thackeray ha Matoshree ha Mumbai bad ka la pynpaw biang ïa ka jinglong ba shitrhem jong ka sha katei ka seng.
U dkhot ka Core Committee jong ka Yuva Sena, ka Rajool Patil, u la ong, “Nga la wan sha u Uddhav ban pyni ïa ka liang jong nga, bad nga la ïathuh ha u ba nga don bad ka Shiv Sena (UBT).”
