Bengaluru, Jylliew:
Ka sorkar Karnataka kan weng noh ïa ka rai ban pyntreikam biang ïa ka Mahatma Gandhi National Rural Employment Guarantee Act (MGNREGA), kaba la pynkylla kyrteng thymmai mynta kum ka Viksit Bharat-Guarantee na ka bynta ka Rozgar bad ka Ajeevika Mission (Gramin) (VB-G RAM G), naduh ka 1 tarik u Naitung, watla ka buh ïa ka jingkitkhlieh kaba kham heh ha ka jylla.
U Myntri ka tnad pynroi ïa ki thaiñ nongkyndong bad ka Panchayat Raj jong ka Karnataka, u Eshwar B Khandre, u la pynbna ba ïa kane ka skhim yn pyntreikam naduh ka tarik ba la buh da kaba pynleit jingmut ha kaba ïada bad ka jingmyntoi jong ki longïing nongkyndong, ki kynthei, bad ki bynta kiba rit paid, wat hapdeng ka jingkiew dor sha ka pla tyngka jong ka jylla.
Hapoh ka jingpynbeit jong ka samoi treikam ka sorkar UPA kaba mynshwa, ka sorkar pdeng ka kit 90% na ka jinglut jingsep katba ki jylla ki noh synñiang tang 10%. Hynrei, ki kyndon thymmai ki bthah ïa ka jingïasam 60:40, “bym hok” kaba pynkiew ïa ka jingkit ha ki jylla, u la ong.
“Kane ka dei ka jingkit kaba khraw ïa ka jylla”, la ong u Khandre da kaba bynrap ba hapdeng u snem 2006 bad 2026, ka sorkar pdeng ka la noh synñiang T.56,492 klur hapoh ka MGNREGA ha Karnataka, katba ka jylla ka la pynlut tang T.4,821 klur bad ka la pynmih haduh 18.2 klur ki sngi trei kam. Ha kane ka jingpynbeit thymmai, ka jylla mynta kan hap ban kit T.3,806 klur ha ka shisnem.
U Myntri u la kynthoh ïa ka sorkar pdeng kaba la wanrah ïa kane ka aiñ kaba thymmai khlem da pan jingmut bha na ki jylla.
“Ha ka rukom synshar jong ka sorkar pdeng, la dei ban shim ïa ki jylla ha ka jingshaniah.Ngi pyrshah ïa kane bad ïa kane ka kam la tuklar ruh ha Supreme Court”, u la bynrap.
U Khandre u la ong ba ka sorkar pdeng ka la mang T.5,709 klur sha ka Karnataka hapoh kane ka skhim thymmai, kaba donkam ïa ka jylla ban noh synñiang T.3,806 klur. U la kdew ba u Myntri Rangbah ka jylla u DK Shivakumar u la dep ban ai jingmynjur ïa ka bhah jong ka jylla hadien ka jingkyrpad na ka tnad.
U Khandre u la pyrshah ruh ïa ka jingbthah jong ka sorkar pdeng ban ym ai kam ai jam haduh 60 sngi ha ka aïom rep, da kaba ong ba ka long “pyrshah ïa ki nongrep” bad “bym ïahap bad ka saïan”.
“Da ki mashin rep kiba mynta kiba la pyndonkam mynta, ki longïing nongkyndong ki ïoh tang khyndiat eh ki kam rep wat ha ka por rep ruh. Kane ka jingleh ka long kum ban knieh noh ïa ka bam na ki baduk,” u la ong.
U Khandre u la bynrap ba ka jylla kan pynpaw ïa kine ki jingeh baroh ha ka jingïalang jong ki Myntri ki tnat pynroi nongkyndong na kylleng ka ri kaba la buh ban long ha Delhi ha ka 28 tarik u Jylliew.
