Bengaluru, Jylliew:
Ka sorkar Karnataka ka la bthah ïa baroh ki tnad ban pyndep ïa ka jingpynrung kam sha palat 72,000 tylli ki kam ba la mynjur ha kylleng ki tnad bapher bapher hapoh hynriew bnai. U IAS ophisar ba rangbah jong ka kyrdan Additional Chief Secretary un buddien ïa kane ka jingtreikam.
La bthah ïa ki tnad ban pynmih ïa ki jingpynbna thungkam hapoh ar bnai, ban pyndep ïa ki eksamin hapoh saw bnai bad ban pynmih ïa ki hukum thung kam hapoh hynriew bnai .
Katkum ka hukum jong ka sorkar kumba ka paw ha ka lad pathai khubor, ka sorkar jylla ka la mynjur ban pyndap ïa ki 72,186 tylli ki kam ha ki tnad treikam bapher bapher.
Na kine, ka tnad pla tyngka ka la ai jingmynjur ban thungkam haduh 40,009 tylli ki kam bad 32,177 tylli ki kam hapoh ka Kalyana Karnataka Cadre ïa kaba ka tnad ka la lang.
Ka GO ba la pynmih ha ka taïew ba la lah, ka pule ba ban pynthikna ban pyndep kloi ïa ka jingpynrung kam, la ïoh ïa ki Action Plan na ki bor pynrung kam bad la buh ha khmat ka kynhun Myntri ban ïoh jingmynjur.
Ka jingkitkhlieh ban pynsted ïa ka jingpynrung kam sha ki kam kiba dei ban pyndap lyngba ka jingpynrung kam beit ha ki 17 tylli ki tnad la aiti ha u Additional Chief Secretary jong ka Sorkar bad ka Development Commissioner. Kumjuh ruh, ka jingkitkhlieh ban pyndep ïa ka jingpynrung kam beit sha ki kam ba lait ha ki 34 tylli ki tnad la aiti ha ka sorkar.
