Ahmedabad, Jylliew:
Kum shi bynta ban bteng ïa ka jingïakhun pyrshah ïa u drok, ha ka 26 tarik, ki pulit ka Gujarat ki la kurup ïa ki dawai pynbuaid kiba shongdor palat T.13,600 klur ha kine ki san snem ba la dep, kaba la khanglad ïa ki ban poi sha Gujarat bad sha kiwei kiwei ki jylla.
Katkum ka jingkheiñ ba la ïoh da ka sorkar, la mudui palat 3,700 tylli ki jingjia kiba ïadei bad u drok ha kylleng ka jylla bad 5,346 ngut ki nongshah kynnoh la kem ha katei ka por. Ki pulit ka Gujarat ki la ïoh ban kurup ruh palat 1.36 lak kilo ki dawai pynbuaid.
U Deputy Chief Minister u Harsh Sanghavi u la ong ba kane ka jingïakhun ka la wanrah ka jingsyier ïa ki nongkhaïi drok bad ki kynhun jong ki. “Mynta, ki nongkhaïi drok ki tieng ban pyndonkam ïa ka Gujarat kum ka lynti ban kit ïa u drok sha kiwei pat ki jylla.
Ki tnad jong ngi ki la thmu beit ïa man la ka bynta ha ka jingpynpoi drok bad pynthikna ba u drok un ym poi sha ki samla jong ka Gujarat ne ka ri.”
U Director General of Police u G.S Malik u la ong ba ki jingïoh kurup ki pyni ïa kawei na ki jingpyrshang pyrshah drok kaba heh tam jong ka kynhun pulit jong ka jylla. U la ong ba ki jingtreikam jong ka Gujarat ki la pyntlot ïa ki katto katne ki kynhun khaïi drok ha ka pyrthei.
“Ka Sorkar Gujarat ka pyntreikam ïa ka polisi kaba pyrkhing bha ban ym shah pyrshah ïa ki nongkhaïi drok. Lyngba ki jingtreikam ba ïatreilang, ngi la pynrung da ki hajar tylli ki mukotduma, ngi la kem da ki hajar ngut kiba shah kynnoh, bad ngi la pynpra ïa u budlum jong ki katto katne ki kynhun khaïi drok ha ka pyrthei.”
Ka jingtip ka pyni ïa ka jingkiew ha ka jingtreikam jong ki bor pynjari aiñ, ha kaba la mudui 315 tylli ki mukotduma ba ïadei bad u drok ha u snem 2020 haba ïanujor bad 584 tylli ki mukotduma ba la mudui ha ki san bnai ba nyngkong jong u snem 2026.
Ban pynkhlaiñ ïa ki kam pyrshah ïa u drok, ka Gujarat ka la pynmih ïa ka ‘Drug Reward Policy’ ha kaba ki pulit, ki nongshong shnong bad ki nongpyntip kiba ai ïa ki jingtip kiba lah ban leh kiba ïalam sha ki jingkurup kiba heh ki lah ban ïoh ïa ka jingsiew pisa. Ka jylla ka la pyntreikam ruh ïa ka ‘Out-of-Turn Promotion Policy’ na ka bynta ki pulit kiba don bynta ha ki kam kiba heh pyrshah ïa ki network khaïi drok.
Ki pulit ka Gujarat ki la shim ïa ki jingtohkit ba la pynïaid da ka teknoloji lyngba ka ‘NARIT’ software ba la pynshong nongrim ha ka jingstad thymmai, kaba la pyndonkam ban bishar bniah ïa ki jingthoh jong ki nongleh kam sniew, ki jingïadei ha ka liang ka pisa tyngka, ki rukom ïakren bad kiwei kiwei ki jingtip kiba ïadei bad ki nongleh kam sniew.
Ki heh sorkar ki la ong ba kane ka rukom ka ïarap ïa ki nongtohkit ban ithuh ïa ki jaka khaïi briew kiba kham heh bad ban pynkhlaiñ ïa ki mukotduma katkum ka NDPS Act.
Ka jylla ka la thaw ruh ïa ka kynhun ba kyrpang ban ïaleh pyrshah ïa ki jingdih buaid (ANTF) bad ai bor ïa ki thanat pulit ba marjan ban ujor bad tohkit ïa ki kam NDPS. Ki jingthmu ki dang ïaid ban buh ïa ki cell pyrshah ïa u drok haman la ki distrik.
Nalor ki lad pyntreikam, ka jylla ka la pynheh ïa ki jaka pynduh jingdih buaid, ai jingmut bad ki jaka sumar ïa ki briew kiba shah ktah ha ka jingdih buaid.
“Kane ka jingïaleh kam dei tang ban kem ïa ki nongleh kam sniew. Ka dei ruh ban ïarap ïa ki samla ban jop ïa ka jingdih buaid bad ban wanphai biang sha ka jingim kaba koit ba khiah,” la ong u Sanghavi.
