Hukum u Myntri ka tnat ka koit ka khiah ka Odisha ban wanrah ïa ki lad jingïada na ka jingpluh ding

Bhubaneswar, Jylliew:

Shisngi hadien ba ka bor pyniaid jong ka jylla Odisha (OSDMA) ka la hukum ban leh ïa ka jingpeit bniah ïa ka jingshngaiñ na ka ding ha baroh ki jaka pule jong ka jylla, u Myntri ka koit ka khiah u Mukesh Mahaling u la bishar bniah ïa ka jingpynkhreh ïa ka jingshngaiñ na ka ding ha ki jaka sumar bad bthah ïa kine ki heh ban pynkhlaiñ shuh shuh ïa ki lad jingïada.

Kane ka jingbthah ka wan hadien ka jingjia pluh ding ha ki ïing dang shen, kaba khatduh eh ka dei ka jingpluh kaba la pynïap briew ha kawei ka jaka ai jinghikai ha Lucknow kaba la pynïap ïa kumba 15 ngut ki briew.

Haba pynïaid ïa ka jingïalang bishar bniah ba hakhliehduh ha Lok Seva Bhawan, u Myntri u la bishar bniah ïa ka jinglong jingman mynta jong ki jingpynbeit ïa ka jingïada na ka ding ha baroh ki jaka sumar bad ki hospital sorkar, ki hospital ba ha khlieh duh jong ki distri bad kiwei kiwei ki jaka ai jingsumar. U la bishar ruh ïa ka jingbud ryntih ïa ki jingbthah ba la pynmih mynshwa ban ïada na ka ding.

Da kaba pynpaw ba ka jingshngaiñ jong ki nongpang ka dei ka mat ba kongsan tam jong ka sorkar, u Mahaling u la bthah ïa ki heh ka koit ka khiah ban pynthikna ïa ka jingpeit bad maramot man ka por ïa ki tiar pynlip ding, ban pynkhlaiñ ïa ka jingpynkhreh na ka bynta ki jingjia ba kyrkieh, ban bud pyrkhing ïa ki kyndon jingïada ba la buh bad ban pynlong ïa ki rukom ïada na ka ding kiba kham khlaiñ bad treikam bha ha kylleng ki jaka.

U Myntri u la ong shuh shuh ba ka jingshngaiñ jong ki nongpang bad ki nongtrei ka koit ka khiah ki dei ki kamram ba kongsan jong ka sorkar.

U la ban jur ïa ka jingdonkam ban pynkhreh lypa bad ban shim ïa ki lad ki lynti ha ka por kaba biang ha man la ki jaka pule ban lah ban leh eiei ïa ki jingjia ba kyrkieh kum ka jingjia ba sngewsih ha ka jingpluh ding.

Ha kane ka jingïalang ha kine ki khyndiat sngi ba la leit, la ïadonlang u Managing Director ka National Health Mission (NHM) u D Brunda bad ki heh ophisar jong ka tnad ka Koit ka Khiah.

Ki heh ka tnad ka koit ka khiah ha ka kyrdan distrik ruh ki la ïasoh lyngba ka durkhih.