Mumbai, Jylliew:
Ka sorkar Maharashtra, ka ïathuh ha ka ïingdorbar jong ka jylla, ba haduh 6,667 ngut ki nongrep, ki la ïap na ka jingpynïap ïalade ha u snem 2023, ba kynthup ïa ki 217 ngut ha ka thaiñ Marathwada, kaba la mad ïa ka jingrang tyrkhong.
Katkum ki jingkheiñ ba la pyni da ka sorkar, baroh ki kynthup ïa 4,150 ngut ki nongrep, 2,519 ngut ki nongbylla lyngkha bad 77 ngut ki kynthei nongrep.
Katto katne ngut ki nongrep bym don jaka kiba la ïap na ka jingpynïap ïalade kim shym la kynthup ha ki jingkheiñ ba thikna, katkum ki jingtip ba la ïasam ha ka ïing dorbar.
Ïa kine ki jingkheiñ la pynpaw hapdeng ka jingsngewkhia halor ka jingpynslem ban siew bai lutksan ïa ki longïing kiba shah ktah bad ki jingkylli halor ka jingtreikam jong ki skhim Insurance jingthung ha ka jylla.
U MLA ka NCP (SP) u Rohit Pawar u la pynshisha ba bun ki longïing jong ki nongrep kiba la khlad noh na ka jingpynïap ïalade kim pat ïoh ïa ka jingïarap pisa kaba T.1 lak kaba la ai da ka sorkar jylla.
“Kine ki longïing jong ki nongrep ki ïaid na kawei ka jaka sha kawei pat hynrei ka sorkar kam ïarap ïa ki. Bun ki file jingsiew bai lutksan ki dang sahkut halor ki nongrim katkum ki jingpyntreikam ki bor ba mynta. Kumta ka sorkar jylla ka dei ban peit bniah ïa kane ka mat kaba khia bad ïarap ïa ki nongrep.
Nalor kata, ban pynbeit ïa ka rukom siew bai lutksan, ka komiti ha ka kyrdan jong ka distrik bad ka thaiñ ka dei ban thaw ïa ka mat ha ka kyrdan jong ka jaka,” la ong u Pawar. Ha ka jubab jong ka, ka sorkar ka la ong ba ka dang pynlong ïa ki jingpynshai bad ki prokram shabar hapdeng ki kynhun jong ki nongrep.
“Ka sorkar jylla kan pynthikna ruh ba ïa ki jingmyntoi na ki skhim bapher bapher jong ka sorkar jylla bad sorkar pdeng dei ban ai sha ki nongrep bad ki bahaïing hasem jong ki ha ka rukom kaba thikna. Hadien ba la khlad noh u nongrep (u lok), ka jaka jong u ka dei ban leit sha ka kyrteng jong ka lok jong u ; nalor ba ïa ki mar rep ba la khlad noh yn sam ruh sha ki khun ki kti jong ki nongrep,” ong ka sorkar ha ka jingthoh ba la buh.
Ha kajuh ka por, ki jingkheiñ jingdiah jong ka sorkar ki pyni ruh ba ki kompeni ba ai jingsumar ïa ki jingthung ki la lum T.55,425 klur tyngka ha ka premium hapdeng u snem 2016 bad 2025 hapoh ki skhim ai jingïarap ïa ki jingthung.
Na katei ka pisa, la siew T.39,918 klur sha ki nongrep kiba shah pynjulor ki jingthung jingtep jong ki, katba ki kompeni Insurance ki ïoh jingmyntoi T.6,944 klur, katkum ka jingkheiñ ba la pyni ha ka ïing dorbar thawaiñ.
Ka sorkar ka la ong ba ki nongshim Insurance ki shah ban kamai haduh 20%, bad ba kano kano ka pisa kaba palat ïa u pud ba la buh yn pynphai biang sha ka sorkar jylla.
Hapoh ka Pradhan Mantri Fasal Bima Yojana (PMFBY), la ai jingsiew bai lutksan kaba T. 35 hajar shi hectare na ka bynta ka jingjulor jong ki jingthung ba ai um, katba 17 hajar shi hektar la siew na ka bynta ki jingthung bym ai um.
Ka sorkar jylla ka la ong ruh ba ka la pynsangeh noh ïa ka skhim Insurance jingthung da T. 1, da kaba kynnoh ba la pyndonkam bakla ïa ka. Katkum ka jingong jong ka sorkar, ïa ki jingdawa Insurance jingthung mynta la kheiñ katkum ka jingmih na ka aïom ot bad ka jingduhnong ha ka jingmih.
