Jaipur, Jylliew:
Ka sorkar Rajasthan ka la mynjur ban thaw ïa ki 76 tylli ki Municipality bad mang da 684 tylli ki post kiba thymmai.
Kane ka rai jong ka sorkar u Bhajanlal, ka wan ha shwa ka elekshon Municipal bad Panchayat ha Rajasthan, ha kaba ka High Court, ka la buh tarik ba khatduh ha ka 31tarik, Naitung.
Katba ka sorkar jylla ka kam ba kane ka sienjam kan wanrah ïa ka jingpynbha ïa ka jingsynshar paidbah, ki nongkynthoh ki kynthoh ba kane ka rai ka lah ban pynslem shuh shuh ïa ka elekshon jong ka Urban Local Body (ULB) bad ka Panchayati Raj kaba la sahteng slem bha ha ka jylla.
Da kane ka hukum ba la pynmih da ka tnad synshar shnong, ka jingdon ki Urban Local Bodies ha ka jylla baroh kawei ka la kiew na ka 309 tylli sha ka 385 tylli.
Nalor kata, la thaw 684 tylli ki kam thymmai hapoh katei ka tnad ban pynkhlaiñ ïa ka rukom synshar bad ban pynthikna ïa ka jingtreikam kaba suk jong ki 76 tylli ki Municipality kiba thymmai, kaba ka sorkar ka kam ba kan ïarap ban pynsted ïa ka jingpynroi sor.
Kaba bun eh ki Municipality thymmai, hynñiew tylli kawei kawei, kan thaw ha Jaipur bad ha Jhunjhunu distrik. Ha Jaipur, la pynlong ïa ki nongbah Vatika, Jamwaramgarh, Phagi, Dudu, Kanota, Khejroli, bad Kaladera.
La thaw saw tylli ki nongbah thymmai kawei kawei ha ki distrik Dausa, Alwar, bad Tonk; bad la thaw lai tylli kawei kawei ha ki distrik Balotra, Barmer, bad Ajmer.
La thaw ruh ïa ki Urban Bodies kiba thymmai ha ki katto katne kiwei pat ki distrik.
Ban pynthikna ïa ka jingtreikam kaba paka jong kine ki Municipality thymmai, ka tnad sorkar shnong ka la mynjur ban thaw 684 tylli ki kam thymmai, da kaba suk ka long ka jingbun tam ki kam ba la thaw ha kine ki 15 snem ba la dep.
Kane ka rai jong ka sorkar jylla ka dei ka sienjam kaba kongsan tam ban pynïar ïa ki Local Bodies ha ka por ba ka sorkar BJP ka dang synshar mynta.
Ka sorkar Bhajanlal ka ngeit ba kane ka sienjam kan pynsted ïa ka jingpynpoi ïa ki jingdonkam jong ki paidbah bad ki kam pynroi.
