Bhubaneswar, Jylliew:
Ka la don ka jingmudui mukotduma ha ka ïingbishar jong ka Rourkela kaba tuklar ïa ka jinglong aiñ jong ka jingai jingbit jong ka tnad khlaw ïa ka National Institute of Technology (NIT-R) ban pom 1,872 tylli ki dieng na ka bynta ban pynheh ïa ka jaka pule bad wad ban khanglad ïa ka jaka pule ban ïaid shakhmat bad ka kam.
Haba pdiang ïa kane ka jingujor ha ka sngi Balang jong ka taïew ba la lah, ka ïingbishar jong u Civil Judge (Senior Division), ka la pynmih ïa ki jingpynbna sha ki 11 tylli ki liang pyrshah, ba kynthup ïa ka NIT-R, u ophisar khlaw jong ka Rourkela divisional forest officer (DFO) bad u nonglum khajna jong ka Sundargarh, da kaba bthah ïa ki ban wan hajir bad ban file ïa ki show-cause reply jong ki hapoh ka 7 tarik, Naitung. .
Ki nongujor ki la pan ïa ka jingpynbna Ex parte ad-interim ban pynneh ïa ka jinglong jingman, hynrei ka iingbishar ka la rai ban ailad ïa ki liang pyrshah ban shah bishar shwa ban pynmih ïa kano kano ka hukum.
Ïa kane ka dorkhas la mudui da u nongïasaid aiñ jong ka Delhi High Court uba dei u trai shnong Sundargarh u Bashistha Ray (45 snem), ryngkat ki nongïasaid aiñ kiba sah ha Rourkela u RK Singh (67) bad u S.K Pradhan (50).
Ki la buh jingkylli ïa ka jinglong aiñ jong ka jingbit ba la ai da u DFO na ka bynta ban pom dieng ha ki jaka ba la buh kyrpang ban tei ïa ka ïing thymmai jong ka tnad Civil Engineering ha NIT-R.
Haba kynthoh pyrshah ïa ka jingthmu ban pom dieng, ki nongujor ki la kynthoh ba ka jingpynkylla ïa ki 1,872 tylli ki dieng kan don ka jingktah kaba jur ïa ka mariang na ka bynta ka Rourkela, kynthup ïa ka jingkiew ka jingshit jingkhriat, ka jingduh ïa ki jingthaw ba im, ka jingduna ka jinglum ïa ka Carbon, ka jingsniew jong ka jinglong ka suiñbneng bad ka jingbym ïaryngkat jong ka mariang.
