New Delhi, Naitung:
Ka sorkar Delhi ha ka lah sngi U Blei, ka la mynjur ïa ka EV policy kaba thymmai ha kaba baroh ki kali elektrik kiba don ka dor ex-showroom haduh T.30 lak kiba la register ha ka nongbah jong ka ri kin lait na ka khajna surok kaba 100% bad ka bai register.
Hapoh katei ka policy, ki nongthied ïa ki kali ar shaka elektrik kin ïoh ïa ka Subsidy kaba T.30 hajar ha ka snem kaba nyngkong, T.20 hajar ha ka snem kaba ar bad T.10 hajar ha ka snem kaba lai.
Ka policy ka ai ruh ïa ka jingai jingkyrshan kaba T. 50,000, T.40,000 bad T.30,000 na ka bynta ki nongthied ïa ki kali lai shaka elektrik ha ka snem kaba nyngkong, kaba ar bad kaba lai.
Ki nongthied ïa ki trok elektrik jong ka kyrdan N1 (ki nongkit mar kiba ka jingkhia jong ki kali baroh kan ym palat ïa ka 3.5 ton) kin ïoh ïa ka jingpynshlur ban thied haduh T.1 lak, katba ki trai kali BS-IV lane ki kali saw shaka kiba la rim kiba pynduh ïa ki kali jong ki bad pynkylla sha ki kali elektrik jong ki kin ïoh ïa ka slip ban tyrwa sha ki kaba T. 1lak.
Katkum ka jingong jong uwei u heh sorkar, yn ym ai Subsidy ïa ki kali Hybrid.
Yn pynrung kyrteng tang ïa ki auto-rickshaw kiba pyndonkam da ka bording ha Delhi naduh ka 1tarik, Kyllalyngkot, 2027.
Yn weng noh ïa ka jingpynrung kyrteng ïa ki kali ar shaka bathymmai kiba pyndonkam da ka petrol bad CNG, ha kaba tang ïa ki kali ar shaka kiba pyndonkam da ka bording yn shah ban pynrung kyrteng naduh ka 1 tarik, Ïaïong, 2028.
Ka Myntri Rangbah ka jylla ka Rekha Gupta ka la ong ba kumba T.15,000 klur yn bei tyngka hapoh kane ka policy ha ki saw snem ban wan ban kyntiew ïa ka jingpyndonkam ïa ka bording bad ban pynduna ïa ka jingjaboh jong ki kali ha ka nongbah.
Ka Gupta ka la ong ba kane ka polisi kan treikam naduh ka 1 tarik, Naitung kata mynta ka sngi bad la batai ïa kane kum ka sienjam kaba kongsan ban pynlong ïa ka nongbah Delhi kaba lait na ka jingjaboh hapoh ka 31 tarik u Lber, 2030.
Ka sorkar ka la ong ba ka policy ka thmu ban pynheh ïa ki jaka charge bad ki jaka treikam na ka bynta ban pynbiang ïa ki jingtyrwa ba la pynïoh sha ki trai kali.
