Amaravati, Naitung:
Ka kynhun Andhra Pradesh Capital Region Development Authority (APCRDA), ka la pynpaw ba ka don ka jingkyrmen ban lah ban wanrah ïa ki jingkylla bad ki lad ban kyntiew ïa ka jylla Ahdhra Pradesh halor kiba bun ki bynta.
Kane ka jingpynpaw, ka la long khyndiat sngi hadien ba ka kynhun nongmihkhmat na Singapore ki la leit jngoh sha ka nongbah halor ka jingthmu kaba bha, kaba la long ha ka lah sngi U Blei.
Ha kane ka sngi, kane ka kynhun ka la don bynta ha ka jingïalang kaba la long ha ka jaka treikam jong ka Andhra Pradesh Capital Region Development Authority (APCRDA) kaba don ha Rayapudi halor ka jingthmu ïa ka Amaravati bad ka jingïaid shaphrang jong ka projek.
Kane ka jingwan jong kine ki nongmihkhmat, ka long ban pynneh bad bteng ïa ka jingbei tyngka halor ka jingthmu ban kyntiew ïa ki kam pynroi lyngba ki projek bapher bapher.
Ka kynhun na Singapore ka la leit jngoh ar sngi ïa ka nongbah Amaravati, ban bishar bniah ïa ki projek pynroi kiba dang ïaid shakhmat bad ban wad ïa ki lad ban bei tyngka.
Ha ka sngi Ba-ar, ka kynhun ka la leit jngoh ïa ka Shakamuru Park, ki surok bah, bad ki jaka shna jingtei hapoh ka Government Complex, kynthup ïa ki tower MLA bad MLC, ki Bungalow, bad kiwei kiwei ki jingdonkam. Ki heh sorkar ki la batai ïa ka jingstet jong ka roi ka par bad ki la pynpaw ïa ki lad ki lynti kiba lah ban bei tyngka.
Ha kane ka kynhun ki nongmihkmat kaba la don bynta ha ka jingleit jngoh ka kynthup ïa ki nongmihkhmat na ka National University of Singapore, u Yeo Sai Hype, Jo Yimin, L Darshan, Jayesh Kumar; MTI – Francis Chang; SCE – Tai Lian Chu; bad IFC – Anant Shankar.
