Chennai, Naitung:
Ha kaba ïadei bad ka jingkynnoh ba ka la don ka jingthmu ban pynkhyllem noh ïa ka sorkar TVK ha Tamil Nadu, ka la don ka jingkhihwin bad ka jingïapyni nia kaba jur bha ha ka saiñ pyrthei, ha kaba ka TVK bad ki seng ba la ïatreilang bad ka ki la shah kynnoh ba ki la khaii briew bad ki seng ka liang pyrshah ka DMK bad AIADMK.
Ki pulit ka Chennai ha ka sngi Balang, ki la kem ïa lai ngut ki briew katkum ka jingujor jong u MLA ka TVK uba la kynnoh ba u la shah tyrwa pisa T.35 klur da kawei ka kompeni ai jingmut ban kyrshan ïa ka liang kyrshan ban pyrshah ïa u Lamphang ka ïingdorbar thawaiñ. La ïathuh ba uwei na ki lai ngut kiba la shah kem, u dei uba ïajan bad u MLA ka DMK, u Senthil Balaji bad u para jong u, u Ashok.
Katkum ki tnad treikam, kane ka jingthmu ka dei kaba la pynlong ïa ka jingthmu ban pyniehnohkam ïa ki 15 ngut ki MLA jong ka seng TVK khnang ban pynkhyllem ïa ka sorkar ba la ïalam da u Vijay.
Ka la don ka jingujor ejahar, pyrshah ïa u para jong u Balaji u Ashok halor ka jingkynnoh ba u thmu ban pynbam pisa tuh ïa u MLA ka TVK u N Elaiyaraja.
Ka TVK ka la kynthoh jur ïa ka seng DMK namar ba ka la pyrshang ban pynthut ïa ka sorkar da kaba “thied ïa ki MLA”. Ka seng ka la kynnoh ba ha kine ki 40 sngi ba la dep, ki dkhot ka DML ki la leit ïakynduh ïa ki katto katne ngut ki MLA jong ka TVK.
U Myntri ka Tamil Nadu bad u heh nongïalam jong ka seng TVK, u CTR Nirmal Kumar, u la kynthoh ïa ka seng DMK, ba ka pynleit jingmut ha ka “khaïi briew” bad u la ong ba ïa kane ka seng mynta la lap pyrshah ba ka la leh ïa kine ki jait kam.
“Ka DMK ka pyrshang ban khwai ïa ki MLA jong ngi. Mynta la lap pyrshah da ki pulit. Ki la pyrshang ban thied ïa u MLA jong ngi da ka pisa kaba T. 35 klur. Ka DMK ka la pyrshang ban khwai ïa ki MLA jong ngi ha kine ki 40 sngi ba la dep. Wat ïa ki MLA jong ka seng ba la ïatreilang jong ngi ruh ki la leit ïakynduh,” la ong u Nirmal Kumar.
U la kynnoh beit beit ïa u Myntri Rangbah barim u MK Stalin bad ïa u nongïalam ka liang pyrshah u Udhayanidhi ba ki pyrshang ban wanrah ïa ka jingeh. “U paralok ba jan jong u Senthil Balaji u la byrngem ïa u MLA jong ngi.
U Stalin bad u Udhayanidhi ki don sha lyndet jong kane. Ban buhrieh ïa kane, ki kynnoh ïa ka TVK, da kaba ong ba ngi leh ïa ka kam khaïi briew. Ngim ju pynrung ïalade ha ka kam khaïi briew. Ngi sngew shngaiñ ïa ka jingkyrshan jong ki paralok jong ngi,” u la bynrap.
