New Delhi, Naitung:
Ka seng Communist Party of India (CPI) kan pynlong ïa ka jingïalap paidbah ha ka ri baroh kawei pyrshah ïa ka sorkar pdeng ban wad ïa ka jingkhanglad ïa ka jingkiew dor, ka jingpyntikna katkum ka aiñ na ka bynta ka Minimum Support Price (MSP), ka jingïada ïa ka hok jong ki nongtrei, ka jingpyntreikam ïa ka jingmang kyrpang ïa ki kynthei, ka jinghikai paidbah kaba bha bad ka rukom ai jingsumar.
Kum shi bynta jong ka jingïalap, ka seng kan pynlong ïa ka Padayatra (ki jingïaid paidbah) ban sdang naduh ka 6 haduh ka 15 tarik u Nailar, ka ban pynkut noh da ka jingïaid paidbah “Badlaav Zaroori Hai” (ka jingkylla ka long kaba donkam) ha Ramlila Maidan ha Delhi.
Ïa kane ka jingïalang paidbah kaba heh la buh ban long ha ka 1 tarik u Nailur.
Ka CPI ka la pynlong ïa ka jingïalang bad ki nongthoh khubor ban batai ïa ki jingthmu bad prokram jong kane ka jingïalap elekshon ha ka sngi Balang ha kaba ka la pyllait paidbah ruh ïa ka poster jong ka ‘Badlaav Zaroori Hai Rally’ ha ka jingïadonlang u General Secretary ka seng u D Raja bad ki heh nongïalam ba kynthup ïa ki dkhot ka National Secretariat u P Sandosh Kumar, (MP ka Rajya Sabha) Bhalchandra Kango, Annie Raja bad National Executive Member bad CPI Delhi State Secretary Prof. Dinesh Chandra Varshney.
“Ka jingïalang kan pynïasoh lang ïa ki briew na kylleng ka ri ban dawa ban pynkut noh ïa ka jingkiew dor bad ka jingbym don kam don jam, ka jinghikai paidbah kaba bha bad ka jingsumar pang, ka jingpynthikna aiñ na ka bynta ka MSP, ka jingïada ïa ka hok jong ki nongtrei, ka jingpyntreikam ïa ka jingmang kyrpang ïa ki kynthei, ka jingbishar hok ha ka imlang sahlang na ka bynta ki Dalit bad ki Adivasi, bad ka jingpynphai biang ïa ka dor jong ka Riti synshar bad ka dor jong ka synshar paidbah,” la ong ka jingthoh ba la pyllait da ka seng.
“Ïa kane ka jingïalang yn pynlong shwa da ka Padyatra ha ka ri baroh kawei naduh ka 6 tarik haduh ka 15 tarik u Nailar, kaba pynkhih ïa ki briew ha kylleng ka ri halor kine ki mat kiba kongsan,” la bynrap shuh shuh ka kyrwoh.
Haba kren ha kaba pyllait ïa ka poster, u Raja u la ong ba ka ri ka ïakynduh ïa ki jingeh kiba bun jait; namarkata, ngi dei ban pynkhih bad pynshlur ïa ki briew ban ïada ïa ka ri, ïa ka Riti Synshar, ïa ka synshar paidbah, bad ban ïaleh na ka bynta ka jingkylla.
Shuh shuh u Raja u la kyntu ïa ki briew ba kin ïashim bynta ha ka “On the Call of CPI – Delhi Chalo! Badlaav Zaroori Hai Rally.
“To ïasoh bad ngi katba ki briew na kylleng ka ri ki ïawan lang ban dawa ban pynkut noh ïa ka jingkiew dor, ki kam na ka bynta uwei pa uwei u samla, ka jinghikai paidbah kaba bha bad ka jingai jingsumar, ka jingpynthikna katkum ka aiñ na ka bynta ka MSP, ka jingïada ïa ka hok jong ki nongtrei, ka jingpyntreikam mardor ïa ka jingmang kyrpang ïa ki kynthei, ka jingbishar hok ha ka imlang sahlang na ka bynta ki Dalit bad ki Adivasi, bad ka jingpynphai biang ïa ka synshar paidbah. Ki jingkylla ki long kiba donkam. Da ka jingïatylli ngin sa lah ban pynlong ïa kata!” u la buh jingthoh ha ka rynsan X.
