Nongstoiñ, Nailar 06
Ka jingtreishitom jong ki nongïalam ne ki nongmihkhmat, ban kyntiew ïa la ka dong ka thaiñ ka long shisha ka jingmyntoi kaba khraw ïa ki paidbah nongshong shnong kiba da ki phew snem ki angnud ba kin ïoh.
Ka shnong Umdang Pyllun West Khasi Hills ka dei kawei na ki shnong kaba donbok tam ha kaba kane ka shnong ka la ïohpdiang ïa ki projek kam pynroi, hadien ba ka la ïoh ïa ka jingmynjur bad mang pisa na ka Sorkar Jylla na ka bynta ki ar tylli ki projek kam pynroi ïalehkai kiba heh kiba ka mang pisa palat T. 3.46 klur tyngka.
Kine ki projek ki kynthup ïa ka jingpynbha ïa ka madan ïalehkai phutbol jong ka Seng Samla Umdang Pyllun bad ka jingshna ïa ka jaka shong ki paidbah nongpeitkai (gallery) ha katei ka madan ïa kaba la mang pisa ban pyntrei haduh T. 2,01,27,000 tyngka ryngkat bad ka jingtei bad shna ïa ka Indoor Hall kaba kham rit ha ka mang pisa ha ka jinglut T. 45,59,000 tyngka.
Ïa kane la pynbna hi da u MLA ka Mawshynrut u Bah Methodius Dkhar bad uba long u Myntri ka Sorkar Jylla, ha ka jingïalang paidbah kaba la long ha ka madan phutbol hapoh ka shnong Umdang ha kine ki khyndiat sngi ba la lah.
U Bah Methodius u la ong ba ïa baroh ar tylli ki projek la dep mang pisa bad kaba dangsah ka long sa tang ban aiti ïa ki work order sha ki kontraktor na ka bynta ban pyntrei noh ïa kitei ki projek.
U Bah Methodius u la ai khublei ruh ïa u Myntri ka tnat ïalehkai u Bah Wailadmiki Shylla bad kumjuh ruh ïa u Myntri Rangbah u Conrad K. Sangma, da kaba pynpaw ka jingsngewnguh ïa ki na ka bynta ka jingpynurlong ïa kitei ki projek ki ban ai jingmyntoi shibun ïa ki paidbah ka Umdang, khamtam ïa ki samla.
Haba ïakren pat bad u Bah Khraw Kupar Mawsor, President ka Seng Samla Umdang Pyllun, u la pynpaw ka jingsngewnguh ïa u MLA bad ïa ka sorkar jylla kaba la lah ban pynïoh ïa kitei ki projek kam pynroi hapoh ka shnong. “Ngi sngewnguh ïa u MLA bad ïa ka sorkar kiba la mynjur ïa kine ki projek kiba kongsan.”
Shuh shuh u la ong ruh ba lyngba ka jingpynbha ïa ka madan ïalehkai bad ka jingshna ïa ka Indoor Hall, kyrmen ban nangkyntiew bad sei shuh shuh ïa ki samla don sap ha ki kam ïalehkai kiba na ka thaiñ.
U Bah Khraw u la pynpaw ruh ba wat hapdeng ka jingbym don ki lad jingïalehkai kiba biang, bun ki samla na Umdang ki la pyni ïa ka sap kaba kyrpang ha kaba ki samla napoh ka shnong ki la ïoh lad ban ïashim bynta ruh wat ha ka Meghalaya State League kaba dangshu dep.
Na ka liang jong u, u la kyntu ruh ïa ki samla jong ka thaiñ ba kin dang aiti lut ha ka kam ïalehkai da kaba trei shitom bad kilan met man ka por khnang ba kin lah ban ïoh ïa ka jingjop kaba kham khraw ha ki por ban wan.
