Shillong, Nailar 10
Ka lympung ïalehkai 2nd Division Football League 2026 ba la pynïaid da ka Shillong Sports Association (SSA) ka la nangjam shaphrang ha kaba ka Tynring SC, Lawsohtun SC bad ka Sohryngkham SC ki la khur jingjop ha ka lah sngi U Blei.
Hane ka jingïakhun kaba la long ha SSA Stadium ha Polo, ka Tynring ka la pynliem noh ïa ka Sohïong SC da 2-1 kol. Ïa kine la thep da u Babiangdor Khyriem ha ka minit kaba 46 bad u Rahbor Baino (86), katba u Albert Malngiang (63) u la lah ban pynphai kylla shi kol na ka bynta ka Sohïong.
Ha ka jingïakhun kaba la long ha madan MFA, ka Lawsohtun ka la jop da 2-0 kol ïa ka Jongksha SC. Kane ka nam jop ka la wan urlong lyngba ki kol ba la thep da u Mewan Rasmut ha ka minit kaba 11 & 20.
Haba phai sha kawei pat ka jingïakhun kaba la long ha SSA Stadium, ka Sohryngkham ka la pynliem noh ïa ka Umrynjah SC da 2-1 kol. Ïa kine la thep da u Bankynshew Warjri ha ka minit kaba 6 bad u Winstar Kharpraw (25), katba u Wanborlang Nongbri (12) u la lah ban pynphai kylla shi kol na ka bynta ka Umrynjah hashwa ba kan mad ïa ka jingshah rem.
