Shillong, Nailar 10
Ka rynsan ka la long kaba la pynkhreh na ka bynta ban pynlong ïa ka lympung ïakob siat khnam ba la tip kum ka Meghalaya State Archery Championship, ka ban pynlong da ka Archery Association of Meghalaya (AAM), ïa kaba la kyrshan lang da ka tnat ïalehkai jong ka Sorkar Jylla.
Ïa kane ka lympung ïakob siat khnam, ka AAM kan pynlong ha ki lai sngi, naduh lashai sngi Ba-ar ha jaka siat khnam (archery shooting range) jong ka SAI Training Centre ha NEHU bad kan kut ha ka sngi Palei.
Ïa kane ka lympung ïakop yn plie da ka Kong Isawanda Laloo (IAS), Secretary ka tnat ïalehkai jong ka Sorkar Jylla.
Katkum ba la pynkhreh la ïoh jingtip ba ki nongwan ïashim bynta sha kane ka jingïakob na baroh ki distrik kiba don ha ka Jylla, ki la wan poi naduh ka lah sngi U Blei, ha kaba ïa kane ka jingïakob yn pynlong ha ka ïakob siat kynhun (team), para marwei (individual) jong ka Recurve bad ka Compound.
Ban shu kyrtiang dien khyndiat shwa ka jingsdang kane ka lympung, kane ka jingïalehkai siat khnam ha ka Jylla lah ban ong ba ka la don ki dak jong ka jingkiew, kaba la wan hadien ba ki nongïalehkai ka Jylla ki la lah ban khur ar tylli ki takma ksiar bad kawei ka takma rnong na ka 1st Khelo India Tribal Games ba la long ha u Ïaiong mynta ka snem.
Nalor kata la ïoh jingtip ba ka jingthmu ha lyndet ka jingpynlong ïa kane ka jingïakob ka long ruh ban sei madan ïa la ki rang bad thei ïalehkai kiba kynsai, ban mihkhmat ïa ka Jylla ha ka 39th National Games, ka ban long ha kane ka Jylla ha u snem 2027.
