Shillong, Nailar 10
Ka East Khasi Hills District ka la long ka lahduh ha ka State Elite Men Boxing Championship, kaba la poi sha kaba kut ha Willamnagar, East Garo Hills, katba ka Ri Bhoi ka la wan ha ka kyrdan ba-ar.
Ïa kane ka lympung ïakura kaba la neh lai sngi kynthih naduh 5 haduh 7 tarik mynta u bnai, la pynlong da ka Meghalaya Boxing Association ha ryngkat ka East Garo Hills District Boxing Association.
Ïa ka nam Best Boxer la ïoh da u Wanbuddien Syngkli na ka Ri Bhoi District Boxing Associa-tion bad ka Eva Waynie Marbaniang na ka Green Heart Boxing Club. Katba ka nam Emerging Boxer ka leit sha u Dabetmiki Dhar na West Jaiñtia Hills District Boxing Association.
Ha katei ka sngi pyn-kut ïa kane ka rynsan ïakura la wan sakhi lang u Myntri ka Sorkar Jylla u Marcuise N. Marak kum u kongsan, uba la ai jing-ïaroh ïa ki nongpynïaid bad u la pynshlur ruh ïa ki nongïakura ba kin ïai bteng ha kane ka kam ïalehkai khnang ba kin long ki khlur kiba tyngshaiñ ha kawei ka ban wan.
Lah ban kdew ba ha kane ka lympung la wan shim bynta ki nongïakura na ki 9 tylli ki District bad 5 tylli ki klob jong ka Jylla.
