Kolkata, Nailar:
Katkum ka jingïathuh jong ki pulit, la ong ba ïa u Asish Banerjee, uba dei u Symbud Lamphang barim jong ka ïingdorbar jong ka West Bengal, la lap hynnin ka step, ha ka ophis treikam jong ka Trinamool Congress, kaba don hajan ka ïing jongu, ha ka nongbah Rampurhat jong ka Birbhum distrik.
Ïa ka met jong u la lap ba ka la sdien hajrong, ha kaba ïadei bad ka jingjia, la phah na ka bynta ka jingleh post-mortem.
U Asish Banerjee u la shimti ïa ka kam kum u Symbud Lamphang ha ka por ba ka heh nongïalam jong ka seng Trinamool ka Mamata Banerjee ka dang long Myntri Rangbah ka jylla. U la long MLA la san sien ha Rampurhat.
La lap ruh ïa ka kot ba la thoh da ka kti hajan katei ka met ïap, la ïathuh ki khubor na katei ka thaiñ. “Ym don mano mano ba don bynta halor ka jingïap jong nga”, la ong ka jingthoh, katkum ki khubor ba la ïohlum.
U Asish Banerjee, u la pynpaw ruh ïa ka jingsngewsih halor ka jingrung jong u sha ka kam saiñ pyrthei bad ula kyrpad ïa kiba haïing jong u, ba kim dei ban ïadon bynta ha ka kam saiñ pyrthei, ong ki khubor.
Ha ka jingthoh ba la kynnoh, u la kyntait ba u don jingïadei bad ka jingbamsap bad u la pynskhem ba watla um lah ban pdiang ïa ka “jingleh bakla” jong ka seng, hynrei um shym la lah satia ban pyrshah ïa ka.
U Ashish Banerjee, ha katei ka shithi, u la ong ba ym don kano kano ka bor kaba shisha ha ka Tarapith Rampurhat Development Authority (TRDA), bad la kynnoh ba la pyrshang ban pynhapoh ïa u.
“Ngam don kano kano ka jingkitkhlieh ha ka TRDA lait noh tang ban leit sha ki jingïalang bah. Ngam shym la don ha ka komiti tender. Ngam don bor ban soi ïa ki Cheque. Ngam shym la don bynta ha kaba mynjur ïa ki plan ne ban ai ïa ki kot ‘bym don jingpyrshah’.
Ym don mano mano ba ju pan jingmut na nga halor kine ki mat. Nga pynrem ïa ki kam ba la leh. Nga pynrem jur ïa ki jingkynthoh pyrshah ïa nga. Nga kyntu ïa kiba dang samla na kano kano ka longïing ba kim dei ban leit pynïasoh ha ki kam saiñ pyrthei; ai ba kin pynleit jingmut na ka bynta ki ka ki jam jong ki,” u la ong ha ka shithi ba la thoh.
U la shah rem noh ha u Dhruba Saha ka BJP ha ka elekshon jylla kaba la long ha kaba sdang jong une u snem.
Une u shong u sah ha ki dong Hattalapara ha Rampurhat. Ki paidbah kiba bun ki la ïa lum lang shabar ka ophis jong ka seng haba ki la ïohsngew ba la lap ïa ka met jong u.
U Asish Banerjee u la shakri kum u Myntri ka pule puthi bad ka rep ka riang jong ka Bengal naduh ba ka Mamata Banerjee ka la wan ha ka bor synshar ha ka sien kaba nyngkong bun bun snem mynshwa.
Ym slem hadien ba la mih ka khubor jong ka jingkhlad noh jong u, u MP ka Trinamool, u Abhishek Banerjee, ha ka jingthoh ha ka rynsan X, u la ther tyngeh ïa kito kiba pynlong ïa ka jingïalap pynjah burom pyrshah ïa une u nongïalam jong ka Birbhum.
“Ka jingthoh ba khatduh jong u ka buh ïa ki jingkylli kiba khia bad kiba pynkhuslai shaphang ka jingshah pynjah burom kaba u la ong ba u la mad.
Ka seng BJP bad ki bynta jong ki lad pathai khubor ki dei ban pyrkhat ïa ki jingma kiba lah ban mih na ka saiñ pyrthei ha kaba la pynjur ïa ki jingkynnoh, la buh ïa ki nam ha ka jingbishar bad ki briew shimet la pynrem ha ka ïingbishar jong ka jingsngew paidbah,” u la ong.
Ka jingkhlad ba sngewsih jong u MLA barim bad u Dy Speaker barim ka WBLA u Asish Banerjee kam dei tang ka jingpait dohnud, ka dei ban pynkhuslai ïa ka jingïatiplem jong baroh kiba ngeit ba ka politik bad ka kam thoh khubor ki dei ban don u pud u sam.
U Asish Banerjee, u la hiar shuki noh na ka kam Chairman jong ka Trinamool, ha Birbhum district core committee ha u bnai Jylliew, wat la u la pynbna ba un dang long kum u dkhot ba kongsan jong ka seng.
Ka BJP ka la jop 6 tylli na ki 11 tylli ki konstitwensi ha Birbhum ha kane ka elekshon ba dang shen.
Ha u snem 2021, ka Trinamool ka la jop 10 seat pyrshah ïa kawei ka BJP ha kajuh ka distrik.
Ka jingkiew mynta ka sngi ka wan hapdeng ki jingkylla kiba khraw ha ka saiñ pyrthei jong ka Bengal hadien ka jingshah rem jong ka Trinamool hadien 15 snem ka jingsynshar.
Katto katne ngut ki MLA bad ki nongïalam barim jong ka Trinamool ki ïakynduh ïa ki jingtohkit bad jingshah kem kiba ïadei bad ka bamsap.
