Shillong, Nailar 24
Ka Adventurous Hynñiew -trep Offroaders (AHOR) sa shisien pat kan pynlong biang ïa ka jingïakop ñiah kali ha ki jaka ba long ranap bad sharing lum ba la tip kum ka AHOR 4by4 Off Road Challenge 2026 naduh 15 haduh 17 tarik u Risaw mynta u snem.
Ha kane ka sien kaba phra yn pynlong ïa kane ka jingïakop ha Mawsa-dang kaba hajan Tyrsad bad la khmih lynti ïa ka jingwan shim bynta khambun ki nongshim bynta.
Ïa kane ka jingïakop la ju pynlong ha ki jaka ba long ktieh, ki kynja maw bad ha ki jaka ban long ranap lum ha la ki jong ki kyrdan ïakop jong ki kali kata ka Stock Modified, Semi-Modified bad ka Pro-Modified.
U General Secretary ka AHOR Bah Ferdinand Kharjahrin u la pynpaw ha ki lad pathai khubor ha ka lah sngi U Blei u la pynpaw ba ïa kane ka jingïakop la ju pynlong manla u snem bad kane ka die kaba phra. “Lyngba kane ka prokram shibun ki nongñiah kali ki la wan shim bynta bad ki la don shibun ruh ki nongwan jngohkai kiba la wan sakhi lang ïa kine ki prokram kiba la ju pynlong ha ki snem kiba la leit.”
“Ka jaka ha Mawsadang ka long kaba itynnad bad kin don ruh kiwei ki prokam pynbyrngia na ka bynta ki paidbah nongwan peitkai. Te kumta ngi khmih lynti ïa ka jingwan shim bynta kham bun ki nongshim bynta ha la ki jong ki kyrdan ïakop.”
U la pynpaw ba na ka liang ka klob ka la ai khublei ïa ka Sorkar Jylla kaba la kloi ban ai jingkyrshan na ka bynta kane ka prokram ha ki snem kiba la leit. “Ka jingsngewnguh ka leit sha ka tnat Jngohkai, ka tnat ïalehkai, Meghalayan Age, lem bad u Myntri Rangbah u Conrad Sangma kiba la don ryngkat bad ngi ha ka ban ai jingkyrshan ïa ngi ha man ba ngi pynlong ïa ki prokram manla u snem,” u la bynrap.
“Khlem da klet ïa ki padibah nongkyrshan jong ka AHOR, te kumta ngi khot sngewbha ïa ki ba kin wan ban sakhi ïa kane ka prokram mynta u snem ka ban long ha Mawsadang bad ban sakhi ïa kane ka prokram,” la bynrap biang u Bah Kharjahrin.
